საზღვაო ტრანსპორტის სააგენტოს განცხადებით, სომხური მედიის მიერ გავრცელებული ინფორმაცია, რომ ბათუმსა და რუსეთის ქალაქ ნოვოროსიისკს შორის, აპრილიდან რეგულარული საზღვაო გადაზიდვები დაიწყო, ინტერპრეტირებულია და სინამდვილეს არ შეესაბამება.
უწყების ცნობით, აპრილის თვეში, პალაუს დროშის ქვეშ მცურავმა გემმა ნამდვილად შეასრულა, ორი კომერციული რეისი ნოვოროსიისკი-ბათუმის მიმართულებით.
,,სომხეთის ცალკეული მედია საშუალებებით გავრცელებული ინფორმაცია ბათუმსა და რუსეთის ქალაქ ნოვოროსიისკს შორის მიმდინარე წლის აპრილიდან რეგულარული საზღვაო გადაზიდვების დაწყების შესახებ, ინტერპრეტირებულია და სინამდვილეს არ შეესაბამება.
რაც შეეხება ცნობას კონკრეტული გადაზიდვების შესახებ, აპრილში, პალაუს დროშის ქვეშ მცურავმა გემმა “Haci Musa Ucak“- (IMO 9128544), ნამდვილად შეასრულა ორი კომერციული რეისი ნოვოროსისკსა და ბათუმს შორის. ხაზგასასმელია ის ფაქტი, რომ ეს არ არის რეგულარული რეისი, და სრულად არის კომერციული ხასიათის, რომელიც სისტემატურად ხორციელდება. აღნიშნული გემის მფლობელი კომპანია, რომელიც არ იძებნება სანქცირებულთა სიაში, კვლავ გეგმავს კომერციული რეისების შესრულებას. რაც შეეხება ტვირთს, ის სრულად ტრანზიტულია და განკუთვნილია სომხეთის რესპუბლიკისთვის.
საქართველოს საზღვაო ტრანსპორტის სააგენტო, ფინანსთა სამინისტროს შემოსავლების სამსახურთან კოორდინაციით, მუდმივ რეჟიმში ახორციელებს როგორც გემების, ასევე გემთმფლობელების შემოწმებას საერთაშორისო სანქციებთან მიმართებით. შეაბამისად, თუკი გემი, ან გემის მფლობელი არის სანქციების სიაში, მას არ ეძლევა საქართველოს ნავსადგურებში შემოსვლისა და შესაბამისი პროცედურების განხორციელების უფლება,” – ნათქვამია სააგენტოს განცხადებაში.
ბათუმსა და ნოვოროსიისკს შორის საზღვაო გადაზიდვები აპრილში დაიწყო – ArmenPress
