,,დაიწყონ თავიდან გამოძიება მკვლელობის მუხლით,”- ამის შესახებ 23 წლის პროგრამისტის, თამარ ბაჩალიაშვილის დედამ განაცხადა. მისი თქმით, საქმის ყოფილი გამომძიებლის, სერგო შუბითიძის ინტერვიუ, რომელიც მან ”ფორმულას” მისცა, პირდაპირი მტკიცებულებაა.
,,დაიწყონ თავიდან გამოძიება მკვლელობის მუხლით. ეს არის პირდაპირი მტკიცებულება, ისევ მათი უწყების თანამშრომლისგან, რომელმაც უკეთ იცის, რაც ხდება ამ სისტემაში და უტყუარი ფაქტები მოიყვანა, ამიტომ აუცილებელია თავიდან დაბრუნდეს ძიებაში ეს საქმე. ყველა ვარიანტში უნდა დაიწყოს, რას გააკეთებენ, მაგათ ტვინებში რა ხდება მე არ ვიცი. თავიდანვე ყველაფერს აყალბებდნენ და სავარაუდოდ, ახლაც ყველა ღონეს იხმარენ, რომ პირიქით ეს კაცი გამოიყვანონ დამნაშავე”, – განაცხადა თეონა თამაზაშვილმა.
ცნობისთვის, 2020 წელს გარდაცვლილი თამარ ბაჩალიაშვილის საქმის ყოფილი გამომძიებელი, სერგო შუბითიძე ამბობს, რომ მას არ სჯერა ბაჩალიაშვილის თვითმკვლელობის ვერსიის. შუბითიძემ “შაბათის ფორმულასთან” აქამდე უცნობ დეტალებზე ისაუბრა.
„გვამი იყო გასიებული და სხეულის არც ერთი ნაწილი არ იყო ცარიელი. თვალებიდანაც კი მატლები ამოდიოდა. ვერ მოხდა ისე დათვალიერება, როგოროც საჭირო იყო, რადგან გვამი ლპობაში იყო წასული. იყო საუბრები, რომ მანქანაში ბუზი შეფრინდა… მაგრამ მანქანის საქარე მინები ხომ აწეული იყო და რამდენი ბუზი უნდა შეფრენილიყო? შესაძლოა ბუზებისგან წარმოქმნილიყო ეს მატლები, მაგრამ განა რამდენი?“, – განაცხადა სერგო შუბითიძემ „შაბათის ფორმულასთან“ ინტერვიუში.
