მთავრობის კანცელარიასთან აქონდროპლაზიის დიაგნოზის მქონე ბავშვების მშობლების პროტესტი გრძელდება. როგორც ერთ-ერთმა მშობლებმა განაცხადა, არ გაჩერებულან და არც გაჩერდებიან.
,,გაბუნიაც, ჯანდაცვის მინისტრიც საუბრობენ ორაზროვნად, არა კონკრეტულად, ალბათ, ისინიც პრემიერისგან ელიან გადაწყვეტილებას და შემდეგ იტყვიან კონკრეტულ ნაბიჯს. არაფერია სასიხარულო თუ საბჭოში შემიყვანეს, საბჭოში გასაგებია, მთავარია მედიკამენტი როდის შემოვა. ჩვენც გონივრულად გვაქვს გადაწყვეტილი, ამას უნდა ექიმების დატრენინგება, ამას უნდა დრო, კი ბატონო, იყოს 2 თვე, 3 თვე, თუმცა 2 და 3 თვე ჩემი შვილისთვის და იმ ბავშვებისთვის, ვისაც ზედა ზღვარი აქვს, უკან გადადგმული უამრავ წელია, კიდევ დაველოდები 13 წელი თუ დავდიოდი, ამ შრომას წყალში ვერ ჩავყრი. მოეგეთ გონს, ნუ გვტანჯავთ, მაინტერესებს, რას ითხოვთ, აუცილებლად ვიღაც უნდა მოკვდეს? რომ მერე გამოვიდეს მთელი საქართველო? რატომ ვართ ცოტა, სად არიან დედები, მამები, ამაზე დიდი ტანჯვა რა არის? დღეს თუ ჩვენ და ჩვენი შვილები დავმარცხდით კი ბატონო, ავიკრავთ გუდა-ნაბადს წავალთ, მთელი საქართველო წახვალთ საზღვარგარეთ? რატომ არ ხართ ჩვენთან ერთად, რატომ ტირით ტელევიზორებიდან, აქ მოდით და გვერდში დაგვიდექით”, – განაცხადა აქონდროპლაზიის დიაგნოზის მქონე ბავშვის დედამ.
აქონდროპლაზიის დიაგნოზის მქონე ბავშვების მშობლების პროტესტი უკვე მე-15 დღეა მთავრობის ადმინისტრაციასთან გრძელდება. ისინი პრემიერ-მინისტრთან შეხვედრას და მედიკამენტის, „ვოზორიტიდის” შემოტანას და დაფინანსებას ითხოვენ.
