ეროვნული სატყეო სააგენტოს უფროსი კახა ცერცვაძე ბორჯომის მუნიციპალიტეტში იმყოფებოდა, სადაც, ადგილობრივი თვითმმართველობის წარმომადგენლებთან ერთად, „საქმიანი ეზოში“ მიმდინარე სამუშაოებს გაეცნო. სააგენტოს უფროსი ქვეყნის მასშტაბით მოწყობილი „საქმიანი ეზოების“ მუშაობას ეტაპობრივად ეცნობა.
„საქმიან ეზოში“ შესაძლებელია ტყესთან დაკავშირებული ყველა ინფორმაციისა და მომსახურების გამარტივებული წესით მიღება. ხე-ტყის ორგანიზებული დამზადება, რაც ტყის მდგრადი მართვის ერთ-ერთი მნიშვნელოვანი კომპონენტია, ერთი მხრივ, მოსახლეობის სათბობი შეშით უზრუნველყოფას გულისხმობს, ხოლო მეორე მხრივ, სოფლად დამატებითი სამუშაო ადგილების შექმნასა და შემოსავლების ზრდის საშუალებას იძლევა“, – განაცხადა ეროვნული სატყეო სააგენტოს უფროსმა, კახა ცერცვაძემ.
აღსანიშნავია, რომ ქვეყნის მასშტაბით უკვე მოწყობილია 39 „საქმინი ეზო“, მათ შორის, სამცხე-ჯავახეთის რეგიონში – ბორჯომში, ასპინძაში, ადიგენსა და ახალციხეში, ჯამში, 6 „საქმიანი ეზო“ ფუნქციონირებს. ეროვნული სატყეო სააგენტო მოსახლეობას, სურვილის შემთხვევაში, საშეშე მერქნის ტრანსპორტირების მომსახურებასაც სთავაზობს.
2023 წლის ბოლომდე, ქვეყნის მასშტაბით, დამატებით 17 „საქმიანი ეზო“ მოეწყობა.
