საბერძნეთში საქართველოს სრულუფლებიანი ელჩის, იოსებ ნანობაშვილის განცხადებით, გასულ 2018 წელს, საბერძნეთში საქართველოს მოქალაქეებზე 5006 ბინადრობის მოწმობა გაიცა, მათ შორის 2286 პირველადი ბინადრობის ნებართვა იყო, – ამის შესახებ ნანობაშვილი მიმართვას ავრცელებს.
როგორც ელჩი აღნიშნავს, ბერძენ კოლეგებთან ინტენსიურად განიხილავენ ჩვენს თანამემამულეებზე ბინადრობის ნებართვების გაცემის გამარტივების საკითხს, რაც საქართველოს საელჩოს საქმიანობის პრიორიტეტულ მიმართულებას წარმოადგენს.
„ნაყოფიერად ვთანამშრომლობთ საბერძნეთის რესპუბლიკის ყველა შესაბამის სტრუქტურასთან, მათ შორის მიგრაციის პოლიტიკისა და შინაგან საქმეთა სამინისტროებთან, საბერძნეთის პარლამენტთან. ამ თანამშრომლობის ფარგლებში, ბერძენ კოლეგებთან ინტენსიურად ვიხილავთ ისეთ საკითხებს, როგორიცაა: ჩვენს თანამემამულეებზე ბინადრობის ნებართვების გაცემის გამარტივება, საქართველოს მოქალაქეების განცხადებების განხილვის პროცესის დაჩქარება, საბერძნეთის სამთავრობო ინსტიტუტების მხრიდან ჩვენი მოქალაქეების მიმართ პოზიტიური დამოკიდებულების განმტკიცება და სხვ.
ვფიქრობ, ჩვენს ბერძენ პარტნიორებთან თანამშრომლობას კონკრეტული შედეგები მოაქვს. საბერძნეთის მიგრაციის პოლიტიკის მიერ მოწოდებული ინფორმაციით, მხოლოდ 2018 წელს საქართველოს მოქალაქეებზე 5006 ბინადრობის მოწმობა გაიცა, მათ შორის 2286 პირველადი ბინადრობის ნებართვა გახლდათ.
საელჩო აგრძელებს საბერძნეთში მცხოვრებ საქართველოს მოქალაქეთა ლეგალიზაციის ხელშეწყობის სამუშაოებს,“ – აღნიშნულია იოსებ ნანობაშვილის მიერ გავრცელებული მიმართვის ტექსტში.
