,,გუნდს ჩამოყალიბებული პოზიცია არ გვაქვს იმასთან დაკავშირებით, კომისია საჭიროა თუ არა, ეს კომპლექსური საკითხია, არ არის მარტივი ამბავი,”- ამის შესახებ „ქართული ოცნების“ აღმასრულებელმა მდივანმა, მამუკა მდინარაძემ აგვისტოს ომთან დაკავშირებით საგამოძიებო კომისიის შექმნაზე, ფრიდონ ინჯიას ინიციატივაზე საუბრისას განაცხადა.
მისი თქმით, პირადად, დიდი სიამოვნებით დავსვამდა რამდენიმე კითხვას, რაც, როგორც მოქალაქეს აწუხებს.
„შეიძლება მე და ბატონ ფრიდონს ცოტა სხვადასხვა მიმართულებით გვქონდეს კითხვები. ამის გამოც იყო საყვედურები ჩვენი მისამართით, რომ „ოცნება“ ვერ ბედავს ამაზე ლაპარაკს. რაც გასაბედია, ყველაფერს ვბედავთ. მგონია, რომ პრობლემა არ გვაქვს, ბოლო დროს განსაკუთრებით, მაგრამ არის რაღაც საკითხები, შეიძლება მორიდება ჯობდეს ამ საკითხებზე საუბრებს. მაგრამ არსებობს ისეთი კითხვები, რასაც დღესაც, ამ ეთერში დავსვამ და პასუხად, გარანტირებულად გეუბნებით, ხვალ დილიდან ისევ მივიღებთ რუსეთს. როცა პასუხი არ აქვთ, გაჰკივიან რუსეთს. რატომ მოხდა ისე, რომ სტრასბურგი და ჰააგა საწვალებელი გახდა? მეასედ ვიმეორებ, მაგრამ არ შეიძლება ამის დავიწყება, ამის დავიწყება მართლა თავზე ხელის გადასმას ნიშნავს ნაცებისთვის. მაგალითად, ისკანდერის ნაწილი რომ დამალეს, დამალული რას ჰქვია. ამერიკელებთან იყოო. ამერიკელებთან რა უნდოდა, რა პასუხია. ვისთანაც არ უნდა ყოფილიყო, სულ რომ ოჯახის წევრთან ყოფილიყო და გასაგებია, პარტნიორთან იყო, რა მნიშვნელობა აქვს, რატომ გაატანე, ვის გაატანე. უნდა წარგედგინა საქმეში და გაატანე სხვას, ვინც არ უნდა იყოს ის სხვა. რა არგუმენტია, ამერიკელებთან იყო? ანუ დამალეს ისკანდერის ნაწილები, შემდეგ ჩვენი მოსაძიებელი გახდა. იუსტიციის სამინისტრომ დიდი წვლილი შეიტანა მაშინ, უსაფრთხოების სამსახურებმა. მთელი სისტემა იყო ჩართული ამ ერთი ნაწილის, მთავარი მტკიცებულების მოპოვებაზე და დღეს რაღაც რომ მოხდება ხოლმე, რუსეთუმეო, ჩვენსკენ იშვერენ ხელს“, – განაცხადა მამუკა მდინარაძემ ”იმედის” ეთერში.
