საქართველოს ჯანდაცვის მინისტრის, ზურაბ აზარაშვილის განცხადებით, ჯანდაცვის სამინისტრო სასწრაფოს ექიმებისთვის პირობების გაუმჯობესების მიზნით, შესაძლებლობის ფარგლებში, ყველაფერს აკეთებს.
„იქიდან გამომდინარე, რომ სხვადასხვა სამედიცინო სფეროს წარმომადგენლებს, სამწუხაროდ, ძალიან დაბალი ხელფასები აქვთ, მიმდინარე წელს იძულებული გავხდით, მინიმალური ხელფასები დაგვეწესებინა და განვსაზღვრეთ მინიმალური ხელფასები. არ ვფიქრობ, რომ ეს მათთვის ადეკვატური, ღირსეული ხელფასია, თუმცა არის მინიმუმი ექთნის შემთხვევაში, 800 ლარამდე, ექიმის შემთხვევაში – 1 200 ლარის ფარგლებში.
რაც შეეხებათ სასწრაფოს ექიმებს, თითოეულ მორიგეობაზე სასწრაფოს ექიმს უკვე ათპროცენტიანი ზრდით აქვს 250 ლარი დარიცხული დღეში. ვგულისხმობ თითოეულ მორიგეობას. სხვა ექიმებსაც, რომლებსაც მძიმე სამუშაო პირობები აქვთ, მაქსიმალურად გვერდით ვუდგავართ და ვცდილობთ, დღევანდელ რეალობას მოვარგოთ ყველაფერი.
ასევე გასული წლის განმავლობაში სამჯერ მივეცით მათ ეგრეთ წოდებული პრემია. ჩვენს უწყებაში შემავალ არც ერთ სხვა სამსახურს სამჯერ ასეთი პრემია, ბონუსი არ აუღია. ასევე, დაზღვევასთან დაკავშირებით იყო სხვადასხვა სპეკულაცია. ჯერ კიდევ ნოემბრის ბოლოს დავიწყეთ მათთვის ახალი სადაზღვეო პაკეტის შემუშავება. სულ მცირე, საშუალოდ ორჯერ არის გაუმჯობესებული პირობები. ზუსტად ამ გაუმჯობესებული პირობების და შესაბამისად, მნიშვნელოვნად გაძვირებული სადაზღვეო პრემიუმის გამოა, რომ სადაზღვეო კომპანიებს შორის ძალიან დიდი კონკურენციაა. უკვე მეორე თვეა, მიმდინარე ტენდერი გასაჩივრებულია და დავების საბჭოზე ელოდება განხილვას. ეს არის მხოლოდ და მხოლოდ იქით მიმართული, რომ მათთვის გაუმჯობესდეს როგორც სადაზღვეო პაკეტი, ისე ხელფასი, რასაც ჩვენ ვუხდით. ასევე ოფისების უდიდეს ნაწილში დავიწყეთ რემონტი, კარგი სამუშაო პირობების შექმნა. ცალკე ვაკეთებთ თბილისის სასწრაფოსთვის ოფისს, რომელიც რამდენიმე თვეში გაიხსნება.
ასევე ავტოპარკის განახლება მიმდინარეობს. ერთი ტენდერი ჩატარდა, მეორე ტენდერიც გამოცხადებულია და მიმდინარე წელს მანქანებსაც მიიღებენ. ეს ყველაფერი ერთობლიობაში არის ის მაქსიმუმი, რაც ჩვენ შეგვიძლია. ეს არის, რასაც ვაკეთებთ და არ მინდა, ისეთი განცდა დარჩეს საზოგადოებას, რომ ვართ ოფისებში და არაფერს ვაკეთებთ. ეს არის, რაც შეგვიძლია, რასაც ვაკეთებთ და კიდევ ბევრს გავაკეთებთ. ჩვენთან შემოდის კიდევ ცხრა სიპი, ყველამ რომ ხელფასის გაორმაგება მოითხოვოს, რასაკვირველია, ყველას შეუძლია, მაგრამ უნდა იყოს იმისი ადეკვატური, რა შესაძლებლობაც გვაქვს“, – განაცხადა ზურაბ აზარაშვილმა.
