საუბარია იმაზე, რომ თუ გინდა, უცხოეთიდან დაფინანსდე, უნდა დარეგისტრირდე, შეავსო შესაბამისი ფორმები, როგორც ეს არის შეერთებულ შტატებში, ბევრ სხვა ქვეყანაში და შემდგომ უნდა გააგრძელო საქმიანობა, – ამის შესახებ მოძრაობა „ხალხის ძალის“ წევრმა გურამ მაჭარაშვილმა საქართველოს პირველი არხის საინფორმაციო პროგრამა „მოამბეში“, მისი გუნდის მიერ არასამთავრობო ორგანიზაციებთან დაკავშირებით ინიცირებულ საკანონმდებლო ინიაციატივაზე საუბრისას განაცხადა.
კითხვაზე, რა შეიცვლება აღნიშნული საკანონმდებლო ინიციატივის შედეგად არასამთავრობო ორგანიზაციებისთვის, გურამ მაჭარაშვილმა განაცხადა, რომ საზოგადოება გაიგებს, ვინ არის ნამდვილად არასამთავრობო სექტორი, საიდან ფინანსდებიან და რას საქმიანობენ.
„არასამთავრობო ორგანიზაციებისთვის არ ვიცი, რა შეიცვლება, მაგრამ საქართველოსთვის, საქართველოს საზოგადოებისთვის ნამდვილად შეიცვლება ის, რომ გაიგებს საზოგადოებაც, სახელმწიფოც, ვინ არის ნამდვილად არასამთავრობო სექტორი, საიდან ფინანსდებიან, რას საქმიანობენ და მერე, რა თქმა უნდა, ამას უპრობლემოდ გააგრძელებენ. კიდევ ერთხელ ვამბობ, ჩვენ ვსაუბრობთ იმაზე, რომ ეს კანონპროექტი ძირითადად დაყრდნობილი იქნება აღნიშნულ საკითხთან დაკავშირებით შეერთებულ შტატებში არსებულ კანონმდებლობაზე. რა თქმა უნდა, ასევე სხვადასხვა ევროპული ქვეყნის, დემოკრატიული ქვეყნების კანონმდებლობა შეიძლება, ნაწილობრივ იყოს გადმოტანილი ამ კანონპროეტქში, მაგრამ ძირითადად მაინც გათვალისწინებული იქნება შეერთებული შტატების შესაბამისი კანონმდებლობა. საუბარია იმაზე, რომ ეს იქნება არასამეწარმეო სუბიექტი, სხვა ტიპის ფიზიზკური თუ იურიდიული პირები, რომლებიც დაფინანსებას იღებენ უცხოეთიდან, შესაბამის რეესტრში უნდა დარეგისტრირდნენ და შემდგომ გააგრძელონ საქმიანობა. მეტი აქ არაფერზეა საუბარი. ჩვენთან არასამთავრობო სექტორის წარმომადგენლები 90-100 პროცენტით არიან უცხოეთიდან დაფინანსებული და შემდგომ საქმიანობენ. საუბარი არის იმაზე, რომ თუ შენ გინდა, უცხოეთიდან დაფინანსდე, უნდა დარეგისტრირდე, შეავსო შესაბამისი ფორმები, როგორც ეს არის შეერთებულ შტატებში, ბევრ სხვა ქვეყანაში და შემდგომ უნდა გააგრძელო საქმიანობა. აქ მეტი არაფერზეა საუბარი. თუ შენ ამას თავს აარიდებ, ესე იგი, გარკვეული ტიპის ეჭვები და განზრახვები გაქვს, რაღაც სხვა და ამ შემთხვევაში, ბუნებრივია, დაინტერესდება შესაბამისი უწყება. ამასთან დაკავშირებით დეტალებში აღარ შევალ, რა წერია შეერთებული შტატების შესაბამის კანონმდებლობაში. ეს შეიძლება, საზოგადოებამ თავად იხილოს“, – განაცხადა გურამ მაჭარაშვილმა.
კითხვაზე, რა სახის დიფერენცირებას გულისხმობს საკანონმდებლო ინიციატივა, გურამ მაჭარაშვილმა განაცხადა, რომ ბოლო წლებში არასამთავრობო სექტორის ნაცვლად, ვიხილეთ ანტისამთავრობო სექტორი.
„ძალიან მარტივია. ჩვენ ბოლო თვეებსა და წლებში არასამთავრობო სექტორის ნაცვლად, ვიხილეთ ანტისამთავრობო სექტორი, არასამთავრობო ორგანიზაციის ნაცვლად – პოლიტიკური პარტია. დამისახელეთ არასამთავრობო ორგანიზაცია, რომელიც უცხოეთში მოღვაწეობს და აქციებს ატარებს პოლიტიკურ საკითხთან დაკავშირებით, ულტიმატუმს უყენებს ხელისუფლებას, რომ შეიცვალოს მთავრობა, თუ არადა, წალეკავენ და ასე შემდგომ. სად არის ასეთი არასამთავრობო ორგანიზაცია. შესაბამისად, საზოგადოებაში არის მოთხოვნა“, – აღნიშნა გურამ მაჭარაშვილმა.
მისივე თქმით, პოლიტიკაში წავა თუ სად წავა ფიზიკური პირი, ეს მისი საქმეა.
„მაგრამ თუ შენ არასამთავრობო სექტორის საქმოანობა გინდა, ამ შემთხვევაში უნდა დარეგისტრირდე შესაბამის რეესტრში, მერე საზოგადოება და სახელმწიფო დაგაკვირდება, როგორ საქმიანობ და რანაირად საქმიანობ. ეს არის და ეს. აქ რაიმე სხვა ტიპის აკრძალვაზე საუბარი არ არის. კიდევ ერთხელ ვიმეორებ, ეს არ არის ახალი ველოსიპედი. ძალიან მიკვირს ხოლმე, როდესაც ჩვენ ვიღებთ რაღაც კანონპროექტებს განსახილველად, ევროპის ქვეყნებიდან გადმოგვაქვს, შეერთებული შტატებიდან გადმოგვაქვს და აქ ნათლავენ, როგორც მეორედ მოსვლას. ახლა მაგალითად პოსტი წავიკითხე გიორგი ბურჯანაძის, თურმე ეს კანონპროექტი მას აგონებს „ესენგეს“ კანონს. ანუ ბურჯანაძე ამბობს, რომ შეერთებულ შტატებში დღეს მოქმედებს „ესენგეს“ კანონი. კი ბატონო, თუ შეერთებულ შტატებში რაც არის, ბურჯანაძე ამას უწოდებს „ესენგეს“ კანონს, ჯერ ამერიკაში დარეკოს, იქ კარგად გაარეკვიოს, უთხრას, რატომ მოქმედებს „ესენგეს“ კანონი შეერთებულ შტატებში და მერე მოვიდეს ჩვენთან პრეტენზიით. აი, ასეთ გაუგებრობაში არიან და უკვე იმდენად ხელმოცარულები არიან, ისეთ შოკში არიან უკვე, ვეღარ ხვდებიან, რას ამბობენ. ჩვენ ხომ ველოსიპედს არ ვიგონებთ. ჩვენ ვამბობთ, რომ შეერთებულ შტატებშია, დემოკრატიულ ქვეყნებშია, იქ თუ უსაფრთხოება უნდა დაიცვან სახელმწიფოებმა და კარგია, ჩვენთან რატომ არ უნდა დავიცვათ ეს უსაფრთხოება. ჩვენთან რატომ არის ანტიდემოკრატიული ის, რაც ევროპისა და ამერიკის ქვეყნებში არის დემოკრატიული“, – განაცხადა გურამ მაჭარაშვილმა.
მისივე თქმით, როდესაც კანონპროექტი წარდგენილი იქნება, საზოგადოებას ყველა დეტალს გააცნობენ, საპარლამენტო განხილვებისას, მსჯელობის პროცესში კი შესაძლოა, გარკვეული ცვლილებები შევიდეს.
„ხალხის ძალაში“ დღეს განაცხადეს, რომ ამზადებენ ორ კანონპროექტს, რომლებიც არასამთავრობო ორგანიზაციების საქმიანობასა და მედიაში სიცრუის გავრცელების საკითხებს შეეხება.
