ნატო-ს გენერალური მდივანი იენს სტოლტენბერგი უკრაინის ომის გაყინვის წინააღმდეგ გაფრთხილებით გამოდის. ამის შესახებ მან Financial Times-თან ინტერვიუში განაცხადა.
სტოლტენბერგის თქმით, უკრაინაში საბრძოლო მოქმედებების ნებისმიერი გაყინვა საშუალებას მისცემს კრემლს პაუზის დროს შეავსოს და გადააჯგუფოს ძალები ახალი დარტყმისთვის.
მისი თქმით, ომის დასრულების დასაჩქარებლად ნატო-ს მოკავშირეებმა უკრაინისადმი იარაღის მიწოდება უნდა გაზარდონ.
„რუსეთი ცდილობს ამ კონფლიქტის გაყინვას გადაჯგუფებისა და მოგვიანებით უფრო მასშტაბური თავდასხმის მიზნით, რადგან უკრაინა ახლა ინიციატივას ფლობს”, – თქვა სტოლტენბერგმა.
მან აღნიშნა, რომ უკრაინამ უნდა დაადგინოს რუსეთთან ნებისმიერი მოლაპარაკებების დრო და შინაარსი.
„რაც უფრო გვინდა მშვიდობიანი გადაწყვეტილების მიღწევა, მით უფრო გადაუდებელია უკრაინისადმი სამხედრო დახმარების მიწოდება”, – თქვა სტოლტენბერგმა.