,,ერთმანეთის მიმართ ცინიკურად საუბრობენ თუ ნიშნის მოგებით, ნამუსის შენახვით თუ ნამუსის შეუნახავად, საზოგადოებისთვის ყველაფერი ნათელია. აშკარად ჩანს, რომ „ნაცმოძრაობა“ არის გაღატაკებული,” – ამის შესახებ პარლამენტის პირველმა ვიცე-სპიკერმა გია ვოლსკიმ განაცხადა.
ვოლსკი ნიკა მელიას განცხადებას ეხმაურება, რომლის თქმითაც, „ადამიანებს, ნაცვლად იმისა, რომ წვლილი შეეტანათ კონსოლიდაციასა და პარტიის გაერთიანებაში, სხვა ინტერესები ამოძრავებდათ და ნამუსი ძალიან ბევრს შევუნახე”
„არ არის პოზიტიური, რომ საქართველოში არსებობს ყველაზე მრავალრიცხოვანი პოლიტიკური პარტია, რომელიც ორიენტირებულია, როგორ დააზიანოს თავისი ქვეყანა. დაზიანებაში ერთმანეთს ეჯიბრებიან. ვერ შეარჩიეს ადამიანი, რომელსაც გარკვეული ინტელექტუალური რესურსი აქვს ნებისმიერ საკითხზე მსჯელობისას, რომელიც ქვეყნის ინტერესებს შეესაბამება, იქნება ეს საგარეო პოლიტიკა, თუ ეკონომიკა. „ნაციონალურ მოძრაობაში“ ასეთი ლიდერი არ არსებობს და ეს არის მიზეზი, რატომაც ჭიანურდება პარტიაში არჩევნები. „ნაცმოძრაობაში“ ერთმანეთის მიმართ ცინიკურად საუბრობენ თუ ნიშნის მოგებით, ნამუსის შენახვით თუ ნამუსის შეუნახავად, საზოგადოებისთვის ყველაფერი ნათელია, აშკარად ჩანს, რომ „ნაცმოძრაობა“ არის გაღატაკებული, როგორც პოლიტიკური სუბიექტი და ჩამოყალიბდა, როგორც დესტაბილიზაციის მსურველი გუნდი. შუნახავენ თუ არა ერთმანეთს ნამუსსა და სინდისს, ეს ვერანაირად ვერ განაპირობებს ნამუსისა და სინდისის არსებობას პარტიაში“, – განაცხადა გია ვოლსკიმ.
