უკრაინის პრეზიდენტის, ვოლოდიმირ ზელენსკის განცხადებით, გასული დღე-ღამის განმავლობაში რუსეთის საოკუპაციო ძალებმა უკრაინის ტერიტორია 400-ჯერ დაბომბეს. მისივე თქმით, საოკუპაციო ძალების დაბომბვის შედეგად განადგურებული ელექტროგადამცემი ხაზების აღდგენა ინტენსიურ რეჟიმში მიმდინარეობს.
„ყველაზე სასტიკი ბრძოლები, როგორც ადრე, დონეცკის რეგიონშია. მიუხედავად იმისა, რომ დღეს ნაკლები თავდასხმებია – ამინდის გაუარესების გამო, რუსული დაბომბვის რაოდენობა, სამწუხაროდ, უკიდურესად მაღალი რჩება. ლუგანსკის რაიონი – ნელ-ნელა და ბრძოლებით მივდივართ. დღეის მდგომარეობით, დღის დასაწყისიდან აღმოსავლეთში 400-მდე დაბომბვა მოხდა. მადლობა ყველას, ვინც პოზიციებს ინარჩუნებს და ეხმარება ჩვენს თავდაცვის ძალებს. სამხრეთი – ვიცავთ პოზიციებს, თანმიმდევრულად და ძალიან გათვლილად ვანგრევთ ოკუპანტების პოტენციალს. მეორე არის ენერგია. ქსელების აღდგენა და ტექნიკური მომარაგების შესაძლებლობები, ელექტროგადამცემი ხაზების განაღმვა, შეკეთება – ყველაფერი გრძელდება 24 საათის განმავლობაში. მესამე არის საგარეო პოლიტიკა. ფრანკოფონიის საერთაშორისო ორგანიზაციის სამიტის მონაწილეებს სიტყვით მივმართე. ეს არის 50-ზე მეტი მონაწილე ქვეყანა და ორ ათეულზე მეტი დამკვირვებელი ქვეყანა. აფრიკა, აზია, ამერიკა, ევროპა – ყველგან უსმენენ უკრაინას, ყველგან იციან ჩვენი წინადადებები იმის შესახებ, თუ როგორ აღვადგინოთ მშვიდობა უკრაინაში და როგორ აღვადგინოთ სტაბილურობა მსოფლიოში. უკრაინის მშვიდობის ფორმულა მსოფლიოში უკიდურესად დადებითად არის აღქმული. ეს საკმაოდ კონსტრუქციული და რეალისტურია – განსხვავებით რუსული ცარიელი და ცრუ რიტორიკისა, თითქოს მზადყოფნა აქვთ რაიმე სახის მოლაპარაკებისთვის. ჩვენ ყველაფერს გავაკეთებთ, რათა მსოფლიომ მიიღოს უკრაინის მშვიდობის ფორმულა“, – განაცხადა ზელენსკიმ.
