საქართველოს პრეზიდენტი დღეს იმერეთს ესტუმრა

  •  

საქართველოს პრეზიდენტი სალომე ზურაბიშვილი დღეს იმერეთის რეგიონს ესტუმრა და წყალტუბოს მუნიციპალიტეტში ის ტურისტული ინფრასტრუქტურა დაათვალიერა, რომელთაც სამკურნალო ტურიზმის განვითარების რეალური პოტენციალი გააჩნიათ.
პრეზიდენტს წყალტუბოში, სახელმწიფო რწმუნებულმა იმერეთის რეგიონში შავლეგო ტაბატაძემ და ქუთაისის მერმა გიორგი ჭიღვარიამ უმასპინძლეს. შეხვედრაზე ხაზი გაესვა წყალტუბოს, როგორც ბალნეოლოგიური კურორტის განვითარების მნიშვნელობას, სამკურნალო ტურიზმის და ზოგადად ტურიზმის განვითარებისთვის.
პრეზიდენტი უშუალოდ ესტუმრა ძველ სანატორიუმებს: “მეშახტე”, “მედეა”, დაათვალიერა სტალინის აგარაკი, ცივი ტბა, საწურბლიას მღვიმე, გუდიაშვილის პანო.

ადგილობრივი ხელისუფლების წარმომადგენლებმა საქართველოს პრეზიდენტს დეტალური ინფორმაცია მიაწოდეს ტურისტულ ინფრასტრუქტურასთან დაკავშირებით არსებული მდგომარეობის შესახებ და პრეზიდენტის მხარდაჭერით, პროცესის გააქტიურების იმედი გამოთქვეს. მხარის გუბერნატორის, შავლეგო ტაბატაძის აზრით, ყველაფერი უნდა გაკეთდეს იმისათვის, რომ დაინტერესდნენ ინვესტორები. პრეზიდენტი დაინტერესებულია, რომ წყალტუბოს განვითარების გეგმა დაიდოს და მისი განვითარების ტემპი დაჩქარდეს.
შეხვედრაზე აღინიშნა, რომ წყალტუბო და ქუთაისი ერთ ურბანულ კონტექსტში უნდა განიხილებოდეს. წყალტუბოში კი, ტურისტული ინფრასტრუქტურის განვითარების პარალელურად, გასათვალისწინებელია პარკების, მღვიმეების და გამორჩეული არქიტექტურის დაცვის აუცილებლობა.
პრეზიდენტის რეგიონში სტუმრობის მიზანი, სალომე ზურაბიშვილის წინასაარჩევნო დაპირების შესაბამისად, საქართველოს რეგიონების განვითარების პოტენციალის გაცნობა და რეგიონების განვითარების მხარდაჭერაა.

მსგავსი თემები