,,ჩვენ ვფიქრობთ, რომ ნატო-ს კარი ღია უნდა დარჩეს ყველასთვის, ვისაც ნატო-ში გაწევრიანება სურს, ვერ ვხედავ ვერანაირ გონივრულ საფუძველს, საქართველოსა და სხვა ქვეყნებს, რომლებსაც ნატო-ში გაწევრიანება სურთ, რატომ უნდა შეუშალონ ხელი ამის გაკეთებაში,”- ამის შესახებ ჩრდილოეთ მაკედონიის პრეზიდენტმა, სტევო პენდაროვსკიმ ნატო-ს მადრიდის სამიტის დაწყებამდე განაცხადა.
მისი თქმით, ყველა ქვეყნის სუვერენული უფლება უნდა იყოს, თავად აირჩიოს საკუთარი საგარეო პოლიტიკა და უსაფრთხოების არქიტექტურა
„ჩვენ ღიად ვუჭერთ მხარს ქართველების ნატო-ში გაწევრიანების მისწრაფებას, ისევე, როგორც სხვა მოკავშირეებთან ერთად, სრულად ვუჭერთ მხარს ევროკავშირის ე.წ. აღმოსავლეთ პარტნიორობის სხვა ქვეყნების წევრობის მისწრაფებებს. ჩვენ ვფიქრობთ, რომ ნატო-ს კარი ღია უნდა დარჩეს ყველასთვის, ვისაც ნატო-ში გაწევრიანება სურს. წარმოიდგინეთ, დღეს ჩვენთან ერთად არიან ქვეყნები ყველა კონტინენტიდან. ჩვენ გვყავს წარმომადგენლები ავსტრალიიდან, იაპონიიდან. ჩვენ გვყავს პარტნიორები კოლუმბიიდან, სამხრეთ კორეიდან. მე ვერ ვხედავ ვერანაირ გონივრულ საფუძველს, ვერანაირ გონივრულ არგუმენტს, საქართველოსა და სხვა ქვეყნებს, რომლებსაც ნატო-ში გაწევრიანება სურთ, რატომ უნდა შეუშალონ ხელი ამის გაკეთებაში. მსურს, ხაზი გავუსვა ამას განსაკუთრებით უკრაინისთვის. ყველა ქვეყნის სუვერენული უფლება უნდა იყოს, თავად აირჩიოს საკუთარი საგარეო პოლიტიკა და უსაფრთხოების არქიტექტურა, რომლის ნაწილად ყოფნა სურს და არა – სხვა რომელიმე ქვეყანამ. სრული სუვერენიტეტი, ეს არის გაერო-ს წევრი ყველა სუვერენული ქვეყნის ფუნდამენტური დემოკრატიული უფლება“, – განაცხადა სტევო პენდაროვსკიმ.
