,,არ მგონია, ქართველი ხალხის ნება იყოს, რომ ლიბერასტების ჩრდილოვან კაბინეტს გადავცეთ ხელისუფლება”- თორნიკე რიჟვაძე

არ მგონია, ქართველი ხალხის ნება ან ჩვენი წინაპრების ოცნება იყოს, რომ ლიბერასტების ჩრდილოვან კაბინეტს გადავცეთ ხელისუფლება, – ამის შესახებ აჭარის მთავრობის სხდომაზე აჭარის ავტონომიური რესპუბლიკის მთავრობის მეთაურმა, თორნიკე რიჟვაძემ განაცხადა.

რიჟვაძის თქმით, რადიკალური ოპოზიციის წარმომადგენლები ცდილობენ, გამოიწვიონ განსაკუთრებული უკმაყოფილება მოსახლეობაში, თუმცა მისივე განმარტებით,  ისინი ამ მიზანს ვერ მიაღწევენ.

„დღეის მდგომარეობით, შემიძლია, დაბეჯითებით გითხრათ, რომ აჭარის რეგიონში, განსაკუთრებით კი ბათუმში სრულად არის აღდგენილი 2019 წლის ტურისტული ნაკადები, რაც ნიშნავს, რომ ჩვენი გეგმა, რომელიც ტურიზმის აღდგენას ეხებოდა, სრულად მოქმედებს. მაისის თვეში ჩვენ გვქონდა 87%-იანი აღდგენა და უკვე, ივნისის ბოლო დღეების მონაცემების ანგარიშით, სრულად აღდგენილია ტურიზმი აჭარაში. ასევე, ყოველდღიურად იზრდება როგორც აეროპორტების დატვირთვა, ასევე ემატება ახალი საერთაშორისო მიმართულებები, რეისები და ყოველთვიურად 370 საერთაშორისო რეისი შესრულდება ბათუმის აეროპორტში. ამ ფონზე მნიშვნელოვანია როგორც ქალაქში, ისე ქვეყანაში მშვიდობის უზრუნველყოფა, ტურიზმის სექტორის მაქსიმალური მხარდაჭერა და ის ჩავარდნა, რაც გვქონდა ჩვენ ბოლო წლების განმავლობაში, სრულად უნდა იქნეს გამოსწორებული ტურიზმის მიმართულებით.

ყველას კარგად ესმის, მათ შორის ხალხს, რომ რადიკალური ნაწილი ცდილობს, მათ შორის ეს მიმდინარე აღდგენა ნებისმიერი საშუალებით დააზიანონ, გამოიწვიონ განსაკუთრებული უკმაყოფილება მოსახლეობაში, თუმცა ისინი ამ მიზანს ვერ მიაღწევენ და დაბეჯითებით შემიძლია ვთქვა, რომ ჩვენი ქვეყანა აუცილებლად დაიკავებს ჩვენს ღირსეულ ადგილს, მათ შორის, ევროპულ ოჯახში. თუმცა, არა მგონია, ქართველი ხალხის ნება იყოს ან ჩვენი წინაპრების ოცნება, რომ ლიბერასტების ჩრდილოვან კაბინეტს გადავცეთ ხელისუფლება,“ – განაცხადა თორნიკე რიჟვაძემ.

მსგავსი თემები