,,შულავერის კომიტეტი ცდილობს, ქვეყანაში არეულობა, უბედურება და ა.შ. დაგეგმოს, ჩვენ პირველ რიგში უნდა გავცეთ ამ გეგმებს, ეს გააკეთა გუშინ ირაკლი ღარიბაშვილმა. სად იყო შეურაცხმყოფელი ლექსიკა, გიჟებივით, სამარცხვინოდ იქცეოდნენ ეს ადამიანები. აქედან გამომდინარე, ყველაფერს უნდა დაერქვას საკუთარი სახელი,”- ამის შესახებ პარტია „ქართული ოცნების“ თავმჯდომარემ, ირაკლი კობახიძემ განაცხადა, საქართველოს პარლამენტში გუშინ გამართულ სხდომაზე საუბრისას.
კობახიძის განცხადებით, რადიკალური ოპოზიციის წარმომადგენლები, საქართველოს პრემიერ-მინისტრს არ აძლევდნენ სიტყვის გაგრძელების საშუალებას.
„ირაკლი ღარიბაშვილმა საუბარი დაიწყო ევროკავშირის თემით, საუბრობდა იმაზე, რომ აღიარებული იქნება ჩვენი ქვეყნის ევროპული პერსპექტივა, რაც იყო კარგი და მნიშვნელოვანი. ჩაეჭრა მას რადიკალური ოპოზიცია და არ აძლევდნენ სიტყვის გაგრძელების საშუალებას. ამ რეჟიმში ცდილობდნენ, გაეგრძელებინათ სხდომა, რისი საშუალებაც არ მიეცათ. ზოგადად, ჩვენ გვაქვს სურვილი, რომ ხალხს ვესაუბროთ არა იმ თემებზე, რაზეც ყველას გვიწევდა საუბარი, არამედ ვისაუბროთ ორნიშნა ეკონომიკურ ზრდაზე, ეს იქნებოდა უკეთესი სასაუბრო თემები, მაგრამ იმ ვითარებაში, როდესაც „შულავერის კომიტეტი“ ცდილობს, ქვეყანაში არეულობა, უბედურება და ა.შ. დაგეგმოს, ჩვენ პირველ რიგში უნდა გავცეთ ამ გეგმებს, ეს გააკეთა გუშინ ირაკლი ღარიბაშვილმა და ეს გავაკეთეთ ჩვენ. სად იყო შეურაცხმყოფელი ლექსიკა, გიჟებივით, სამარცხვინოდ იქცეოდნენ ეს ადამიანები. აქედან გამომდინარე, ყველაფერს უნდა დაერქვას საკუთარი სახელი. როდესაც ასეთი სახით აჩვენებს საკუთარ თავს ოპოზიცია, მათ უნდა დაერქვათ სახელი. ეს სჭირდება იმას, რომ საზოგადოებამ საბოლოო ჯამში სწორად გაიაზროს, სად ვართ დღეს და ვინ, ვინ არის. გახსოვთ, საპრეზიდენტოს კამპანია როდესაც წარმოებდა, სალომე ზურაბიშვილი შერაცხეს მოღალატედ, დღეს განსხვავებული მესიჯი აქვთ. თვე-ნახევარი ეძახდნენ მოღალატეს, რაზეც არ უპასუხა სალომე ზურაბიშვილმა და მიიღო 38 პროცენტი, მეორე ტურში, როდესაც საკუთარი სახელი დავარქვით „ნაცმოძრაობას“, სალომე ზურაბიშვილმა აიღო 60 პროცენტი. ხანდახან საჭიროა, ყველაფერს დაარქვა საკუთარი სახელი და ამ სამარცხვინო ოპოზიციას უნდა დაერქვას საკუთარი სახელი, რაც კიდევ ერთხელ მოგვიწია გუშინ“, – განაცხადა კობახიძემ.
