,,ევროპის სახალხო პარტიის მიზანი გახლავთ, რომ საქართველომ არ მიიღოს ევროკავშირის წევრობის სტატუსი”- თეა წულუკიანი

„ევროპის სახალხო პარტია“ უკვე აღარ მალავს, რომ მისი ოფიციალური განცხადებები „ნაციონალური მოძრაობის“ მიერ არის შემუშავებული – ამის შესახებ, საქართველოს კულტურის, სპორტისა და ახალგაზრდობის მინისტრმა თეა წულუკიანმა განაცხადა.

მისი თქმით, „ნაციონალური მოძრაობა“ ყველაფერს აკეთებს, რომ საქართველომ არ მიიღოს ევროკავშირის წევრობის კანდიდატის სტატუსი.

„ჩვენ ვიცით, მაგრამ ახლა უკვე ჩვენი საზოგადოებაც კარგად ხედავს, რომ „ნაციონალური მოძრაობა“ და მისი ლობისტები, ამ შემთხვევაში, კონკრეტულად „ევროპის სახალხო პარტია“, რომელიც მოიაზრება „ნაციონალური მოძრაობის“ პარტნიორ ორგანიზაციად, პოლიტიკურ ოჯახად, როგორც ამას ეძახიან და ლობისტად, ყველაფერს ცდილობს, რომ ქართველმა ხალხმა, ჩვენმა ქვეყანამ, სახელმწიფომ არ მივიღოთ ევროკავშირის წევრობის კანდიდატის სტატუსი. რა თქმა უნდა, ეს არ არის მხოლოდ ერთი ჯგუფი, ასეთი ჯგუფი არაერთია და მათი მთავარი მიზანია, ჩვენ როგორმე ევროპისკენ მიმავალ გზაზე, როგორც ერი და ქვეყანა, წარუმატებლები ვიყოთ.

ამჟამად, მათი მთავარი მიზანი, მათ შორის „ევროპის სახალხო პარტიის“ მიზანი გახლავთ, რომ საქართველომ არ მიიღოს ევროკავშირის წევრობის სტატუსი. ეს განცხადებაც სწორედ აქეთ არის მიმართული, რომელიც რბილად რომ ვთქვა, საკმაოდ აბსურდულია. სამარცხვინოცაა, რომ „ევროპის სახალხო პარტია“ უკვე აღარ მალავს, რომ მისი ოფიციალური განცხადებები „ნაციონალური მოძრაობის“ მიერ არის შემუშავებული. ეს ამ განცხადებას სათაურად აქვს წამძღვარებული. ასევე, რბილად რომ ვთქვა, გაუგებარია, რომ იმ ადამიანს, რომელსაც რამდენიმე სისხლის სამართლის საქმეზე აქვს მისჯილი წლების გარკვეული ოდენობა საპატიმროში მოსახდელად, ვგულისხმობ პატიმარ სააკაშვილს, „ევროპის სახალხო პარტია“ კვლავ მიიჩნევს დიდ დემოკრატად. ამ დროს ის არის ადამიანი, რომელიც აქვე, რამდენიმე მეტრში, რუსთაველის გამზირზე არბევდა ჩვენს ხალხს, სცემდა, აწამებდა ციხეებში პატიმრებს და მას ჰქონდა, რომ იტყვიან, ძალიან მძიმე ხელი მართვისას. ძალადობრივი მეთოდით მართავდა ჩვენს ქვეყანას. შესაბამისად, ჩვენ ყველაფერი უნდა გავაკეთოთ, არა მხოლოდ მთავრობამ, საზოგადოებამ, ვიყოთ ერთიანი, მეტად შეკრულები ჩვენს სულისკვეთებაში ევროკავშირისკენ მიმავალ გზაზე. როგორც აქამდე ვაკეთებდით, გავაათმაგოთ ძალისხმევა, რათა ევროკავშირის შესაბამისმა ხელმძღვანელმა პირებმა მიიღონ ის ერთადერთი სწორი გადაწყვეტილება, ერთადერთი სწორი ისტორიულად, კულტურულად და სამართლებრივად გამართლებული, სამართლიანი გადაწყვეტილება, რაც გულისხმობს საქართველოსთვის სტატუსის მინიჭებას. ნებისმიერი სხვა გადაწყვეტილება მიუღებელი იქნება ჩვენი ქვეყნისთვის. თუ ეს მოხდება „ევროპის სახალხო პარტიის“ და სხვათა ძალისხმევის შედეგად, რა თქმა უნდა, ჩვენ გვექნება შესაბამისი შეფასებებიც. მაგრამ ჩვენში, პირველ რიგში, მხოლოდ მთავრობას არ ვგულისხმობ, რასაკვირველია, ვგულისხმობ ჩვენს ქვეყანას და ხალხს“, – განაცხადა თეა წულუკიანმა.

„ევროპის სახალხო პარტია“, „ერთიანი ნაციონალური მოძრაობის“ შეთავაზებით, განცხადებას ავრცელებს

მსგავსი თემები