,,ჩუტყვავილას ვაქცინა არ იცავს მაიმუნის ყვავილისგან”- ამირან გამყრელიძე

დაავადებათა კონტროლის ეროვნული ცენტრის ხელმძღვანელის ამირან გამყრელიძის განცხადებით, საქართველოში „მაიმუნის ყვავილის“ არც ერთი შემთხვევა არ არის დაფიქსირებული. მისი თქმით, მალე ქვეყანაში  ვირუსის სადიაგნოსტიკოდ  სწრაფი პისიარ ტესტები შემოვა.

„ჩვენ დღეს შეგვიძლია „მაიმუნის ყვავილის“ ვირუსის დიაგნოსტიკა. მისი იდენტიფიცირება შეგვიძლია გენუმის სეკვენირებით. სეკვენირების პროცესს სჭირდება სამიდან 4-5 დღემდე. რაც შეეხება სწრაფ პისიარ ტესტებს, რამდენიმე დღეში, მომავალ კვირაში მაინც გვექნება პრაიმერები, რომ ავაწყოთ ეს ტესტი. სავარაუდო შემთხვევა ჯერ არ ყოფილა“, – განაცხადა ამირან გამყრელიძემ.

ამირან გამყრელიძის ცნობით, ევროპის წამლების სააგენტომ ავტორიზაცია მისცა მედიკამენტს, რომელიც „მაიმუნის ყვავილის“ სამკურნალოდ გამოიყენებ და  საქართველო ამ პრეპარატზე განაცხადს გააკეთებს.

„რა თქმა უნდა, პრეპარატზე გავაკეთებთ განაცხადს. მოგეხსენებათ, არსებობს ევროპის წამლების სააგენტოს მიერ ავტორიზირებული მედიკამენტი. სამინისტრო უკვე მუშაობს და ვფიქრობთ, იქნება ქვეყანაში, მაგრამ დღეს ძირითადად სიმპტომური მკურნალობაა“, – აღნიშნა გამყრელიძემ.

გამყრელიძის ცნობით, დღესდღეობით მსოფლიო მასშტაბით „მაიმუნის ყვავილის“ 400-მდე შემთხვევაა დადასტურებული.

„დაახლოებით 400-მდე შემთხვევაა სხვადასხვა ალტერნატიული წყაროთი. ხვალ გამოქვეყნდება ჩვენი ბოლო მონაცემები. ოთხშაბათობით დაიდება ჩვენს ვებგვერდზე ყოველკვირეული მონაცემები და ასევე, უჩვეულო ჰეპატიტების მონაცემები, რაც აწუხებს ჩვენს საზოგადოებას. ჩუტყვავილას ვაქცინა არ იცავს ამ ვირუსისგან. ჩვენი თაობა, 1980 წლამდე ვინც ვართ აცრილი, გარკვეულად დაცულები ვართ. 1980 წლის შემდეგ ვინც დაიბადნენ, არ იქნებიან აცრილი, მაგრამ  საუბარი არ არის მასობრივ ვაქცინაციაზე. ჯერჯერობით, რეკომენდირებულია, რომ საერთაშორისო მასშტაბით თუ დადგინდა, ინფიცირებულთან კონტაქტში მყოფ პირებს აცრიან“, – განაცხადა გამყრელიძემ.

მსგავსი თემები