საქართველოს პრეზიდენტმა სალომე ზურაბიშვილმა განცხადებით, უკრაინელების მამაცი ბრძოლის შედეგია, რომ საქართველო, უკრაინა და მოლდოვა ევროინტეგრაციის გზაზე ახალ ეტაპზე გადავიდნენ.
„ყველამ ვიცით და ეს არის პირველი დღევანდელი მოცემულობა, რომ ეს გადაწყვეტილება, რომელიც იქნება მიღებული, იქნება პოლიტიკური გადაწყვეტილება. ნამდვილად უკრაინელების გმირული ბრძოლის შედეგია, რომ ჩვენ, უკრაინა და მოლდოვა ვართ სხვა განზომილებაში. ეს შემდეგ სადამდე მივა და როგორ, ჯერ არ ვიცით, მაგრამ ფაქტია, გადაწყვეტილება დღეს იქნება არა ბიუროკრატიული, არამედ ძალიან პოლიტიკური“, – განაცხადა სალომე ზურაბიშვილმა.
ამასთან, პრედიზენტის განმარტებით, ევროკავშირის წევრობის კანდიდატის სტატუსზე საქართველოს მიერ განაცხადის წარდგენა უკრაინელების დამსახურებაა.
„ევროპული ინტეგრაციის გზა სულ სხვანაირად გვეჩვენება დღეს. გუშინ ვამბობდით, რომ 2024 წელს განაცხადს შევიტანთ კანდიდატურაზე და ისიც ცოტა ხელოვნური მიდგომა იყო, გავაკეთოთ და ვნახოთ. რეალურად არ იყო ისეთი მომზადებული, როგორიც შეიძლებოდა, ყოფილიყო. ამის შემდეგ უნდა დავლოდებოდით რამდენიმე წელი, რათა პასუხი მიგვეღო კანდიდატურაზე. დღეს კანდიდატურაზე განაცხადი შეტანილია, ეს უკრაინელების, მათი ყოველდღიური ბრძოლის უზარმაზარი დამსახურებაა. ამისთვის ჩვენ შეგვიძლია, მხოლოდ ერთი რამ, მადლიერება გამოვთქვათ, რადგან უამისოდ ეს არ იქნებოდა, უნდა ვიცოდეთ, ვაღიაროთ და არ ჩავთვალოთ, რომ ისეთი რაღაც გავაკეთეთ, რომ უცებ გავხდით ყველაფრის ღირსნი. ეს მათი დამსახურებაა და ჩვენ ამას მივყვებით, მართლია, წლების მანძილზე ჩვენ ამისთვის ვემზადებოდით, შეიძლება, მეტად ვემზადებოდით, ვიდრე სხვა ასოცირებული ქვეყნები, მაგრამ დღეს მათი დამსახურებაა. დღეს ამ გაცხადებულ კანდიდატურაზე მივიღებთ პირველად პასუხს არა წლებში, არამედ თვეებში, მომავალ ორ თვეში. რა იქნება პასუხი, ამას ვერ გეტყვით, ესეც ნაწილობრივ ჩვენზე არის დამოკიდებული, როგორ მოვიქცევით ამ პერიოდში,რამდენად ვაჩვენებთ საქართველოს იმ სახეს, რომელიც არის, მაგრამ უნდა შევძლოთ ამის გატანა და სხვებმაც დაინახონ. რამდენად მზად ვიქნებით, ავიღოთ ნამდვილი ვალდებულებები იმის მიმართ, რაც უნდა გაკეთდეს ქვეყანაში, რომ გახდეს ევროპული იმ მიმართულებებით, როგორიცაა კანონის უზენაესობა, სასამართლო, ეკონომიკის განვითარება, ის სტანდარტები და წესები, რაც არსებობს ევროპაში და რის გამოც მოგვწონს ევროპა“, – აღნიშნა სალომე ზურაბიშვილმა.
