საზოგადოებრივი მოძრაობა “ქართული მარშის” ერთ-ერთი ლიდერი სანდრო ბრეგაძე, საპრეზიდენტო არჩევნების მეორე ტურის დღეს, ქვეყანაში პოლიტიკური პროცესების შესაძლო განვითარების თანმიმდევრობაზე საუბრობს და სავარაუდო სქემას აქვეყნებს.
სანდრო ბრეგაძის ვარაუდით, პრეზიდენტობის კანდიდატი გრიგოლ ვაშაძე, სალომე ზურაბიშვილთან 5%-იანი სხვაობით დამარცხდება, რის შემდეგაც “ნაციონალური მოძრაობა” განკითხვის დღეს მოაწყობს.
“28 ნოემბრის დღის განრიგი: დილით გაიხსნება უბნები, დაახლოებით 12:00 საათზე “რუსთავი-2” და დამკვირვებლები აღმოაჩენენ ვითომ პირველ დარღვევებს; დაახლოებით 15:00 საათიდან “რუსთავი-2”-ის ეთერით გაცხადდება, რომ არჩევნები მასობრივად ყალბდება; 18:00 საათიდან დაიწყება შეხლა-შემოხლა და ფიზიკური დაპირისპირება უბნებზე; 20:00 საათზე დაიხურება უბნები და “რუსთავი-2”-ის ეთერში გამოცხადდება, რომ 52-53%-ით გაიმარჯვა გრიგოლ ვაშაძემ; 20:00- დან 23:00 საათამდე იქნება გამარჯვების ზეიმი “ნაცმოძრაობის ოფისში” და “რუსთავი-2”-ზე; დაახლოებით 23:00 საათზე ცენტრალური საარჩევნო კომისია გამოაცხადებს, რომ წინასწარი შედეგებით 55-60%-ით გაიმარჯვა სალომე ზურაბიშვილმა.
29 ნოემბერს, დილით, ევროპის სახალხო პარტია და ევროპარლამენტარების ნაწილი არჩევნებს გაყალბებულად გამოაცხადებს ევროპარლამენტისგან მოითხოვს არალეგიტიმურად გამოაცხადოს შედეგები. ამის შემდეგ, იგივეს გამოაცხადებენ ქართული არასამთავრობოები, ბოლოს კი ვაშაძის შტაბი გამოაცხადებს სრულ მობილიზაციას და დააანონსებს მიტინგს თავისუფლების მოედანზე, ამას დაარქმევენ განკითხვის დღეს”, – წერს სანდრო ბრეგაძე ფეისბუქის საკუთარ გვერდზე.
