ეროვნული სატყეო სააგენტოს, გურიის სატყეო სამსახურის თანამშრომლების ინიციატივით, რამდენიმე მრავალშვილიან ოჯახს საახალწლო ნობათი გადაეცათ. გურიის რეგიონის სამივე მუნიციპალიტეტში – ჩოხატაურში, ლანჩხუთსა და ოზურგეთში, ჯამში 6 ოჯახს, სატყეო სამსახურის თანამშრომლებმა საკუთარი სახსრებით შეძენილი სათბობი შეშა, სურსათ-სანოვაგე, ტკბილეული თავად გადასცეს.
ერთ-ერთი მრავალშვილიანი და სოციალურად დაუცველი ოჯახი კიღურაძეების ოჯახია, რომლებსაც 4 შვილი ჰყავთ და ოჯახში არავინ მუშაობს. როგორც ოჯახის დიასახლისმა, ლელა კიღურაძემ გვითხრა, მისთვის 1 ლიტრი ზეთიც დიდი დახმარებაა.
ლელა კიღურაძე: „მადლობის მეტი არაფერი მეთქმის. 4 შვილი მყავს და არასდროს არავის გავხსენებივართ. არავისგან დახმარება არასდროს მიმიღია. ჩემთვის 1 ლიტრი ზეთიც საქმეა, როცა 4 შვილი მყავს და სახლში არავინ ვმუშაობთ. უმუშევრად და უზრუნველად მიმიტანეს აგერ საჩუქრები და გაგვახარეს. ვართ სოციალურად დაუცველები, უფროსი შვილი 16 წლისაა, ბავშვებს ყველაფერი აკლიათ, ელემენტარულსაც კი ერ ვახერხებთ. პატარა 2 წლის და 6 თვისაა. მეუღლე ვერ მუშაობს, ჯანმრთელობის კუთხით აქვს პრობლემები. სოციალურს ვიღებთ და ამით ვირჩევთ თავს. თან ქირით ვცხოვრობთ და გვიჭირს ქირის გადახდაც. ზამთარში შეშით ვთბებით. მსგავსი დახმარება ჩვენნაირი ოჯახებისთვის დიდი სიკეთეა.“