კორონავირუსის პანდემიიდან გამომდინარე, ჯანდაცვის სფეროს ექსპერტები მოსახლეობას, საახალწლო დღეებთან დაკავშირებით, მაქსიმალურ მოკრძალებას ურჩევენ. განსაკუთრებით კი ხალხმრავლობისა და დიდი სუფრისგან თავის არიდებას მოუწოდებენ, რადგანაც, ვირუსის ახალი შტამი 50-ზე მეტ ქვეყანაში გავრცელდა და საქართველოსა უტევს.
როგორც ჯანდაცვის ექსპერტმა, პროფესორმა დევი ტაბიძემ „მედიაცენტრ მთავართან“ განაცხადა, საიმედოს არაფერს ელიან, რადგანაც, ახალი შტამის – „ომიკრონის“ საქართველოში შემოღწევის რისკიც მაღალია.
„მთავარია არსებული რეგულაციების მკაცრი დაცვა. განსაკუთრებით ეს საჭიროა ახალი წლის დღეებში. მობილობის გაზრდა პირდაპირ კავშირშია ვირუსის გავრცელების რისკებთან და მასშტაბებთან“ – განაცხადა პროფესორმა „მედიაცენტრ მთავართან“.
ანალოგიური მიმართვა აქვს დაავადებათა კონტროლისა და საზოგადოებრივი ჯანდაცვის ეროვნული ცენტრის ხელმძღვანელს – ამირან გამყრელიძეს, რომელიც, სადღესასწაულო დღეებში დიდი სუფრისა და სტუმრიანობისგან თავის შეკავებას გვირჩევს.