იმუნიზაციის მრჩეველთა ეროვნული ტექნიკური ჯგუფის ხელმძღვანელმა, იაშვილის სახელობის ბავშვთა ცენტრალური საავადმყოფოს სამედიცინო დირექტორმა ივანე ჩხაიძემ „მედიაცენტრ მთავარში“ ქვეყანაში არსებულ ეპიდემიოლოგიური ვითარებაზე ისაუბრა და აღნიშნა, რომ მდგომარეობა გაუარესებულია.
„ბოლო 4 დღეა, ქვეყანაში ინფიცირების მაჩვენებელი მაღალია, 2000-ზე მეტია, რაც პირდაპირ მიუთითებს ქვეყანაში ეპიდვითარების გაუარესებაზე. ინფიცირებულთა საერთო წილში 10-15% ბავშვებზე მოდის. შეგვიძლია ვთქვათ, რომ ბოლო დღეების განმავლობაში ინფიცირების მაჩვენებელმა მოიმატა ბავშვებშიც“ – განაცხადა ივანე ჩხაიძემ „მედიაცენტრ მთავარში“.
პროფესორის შეფასებით, ამ ეტაპისთვის, ბავშვებში საწოლების პრობლემა არ არსებობს.
„ბოლო დღეების განმავლობაში ბავშვებში ინფიცირების მაჩვენებელმა მოიმატა. ჯერჯერობით, ეს არ ასახულა უფრო მეტ მიმართვიანობაში, საწოლფონდის დატვირთვაში. 4 ათასზე მეტი საწოლია თავისუფალი. ასე რომ, ამ მხრივ ჯერჯერობით პრობლემა არ არის, მაგრამ თუ ინფიცირების მაჩვენებელი ამ დონეზე დარჩა ან გაიზარდა, ჩვენ იგივე მდგომარეობას დავუბრუნდებით, როგორშიც აგვისტოს დასაწყისში ვიყავით“, – განაცხადა ჩხაიძემ „მედიაცენტრ მთავარში“.