ფოთის პორტში მომუშავე მამა-შვილი საქართველოში სააკაშვილის შემოყვანის საქმეზე დააკავეს

  •  

მიხეილ სააკაშვილის მიერ საქართველოს სახელმწიფო საზღვრის უკანონო კვეთის საქმეზე ფოთის პორტის ორი თანამშრომელი დააკავეს. დაკავებულია მამა-შვილი – ზურაბ და შალვა წოწორია. ისინი წლების განმავლობაში ფოთის პორტში მუშად მუშაობენ.

სააკაშვილის საქმეზე დაკავებულ კიდევ ერთ პირს, ელგუჯა ცომაიას დანასაულის დაფარვის ბრალდებით სასამართლომ დღეს წინასწარი პატიმრობა შეუფარდა.

მამა-შვილის დაკავების შესახებ ოფიციალურ განცხადებას შინაგან საქმეთა სამინისტრო ავრცელებს, თუმცა ჯერჯერობით უცნობია, სააკაშვილის შემოყვანის სანაცვლოდ მიიღეს თუ არა ფინანსური სარგებელი საქმეში ბრალდებულებმა.

“შინაგან საქმეთა სამინისტრომ, მიხეილ სააკაშვილის მიერ საქართველოს სახელმწიფო საზღვრის უკანონო გადაკვეთის ფაქტთან დაკავშირებით მიმდინარე გამოძიების ფარგლებში კიდევ ორი პირი 1984 წელს დაბადებული შ.წ. და 1960 წელს დაბადებული ზ.წ. დააკავა.
სამართალდამცველებმა ამავე ბრალდებით – დანაშაულის დაფარვისთვის მიმდინარე წლის 1 ოქტომბერს, 1958 წელს დაბადებული ე.ც. დააკავეს. საქართველოს პროკურატურამ დაკავებულს საქართველოს სისხლის სამართლის კოდექსის 375-ე მუხლის მეორე ნაწილის მიხედვით ბრალდება წარუდგინა, რაც მძიმე დანაშაულის წინასწარ შეუპირებლად დაფარვას გულისხმობს. დანაშაული ოთხ წლამდე ვადით თავისუფლების აღკვეთას ითვალისწინებს.
მსჯავრდებული, უკრაინის მოქალაქე მიხეილ სააკაშვილის მიერ საქართველოს საზღვრის უკანონო გადაკვეთის, ორგანიზებული ჯგუფის მიერ საქართველოს სახელმწიფო საზღვარზე მიგრანტის უკანონოდ გადაყვანისა და მძიმე დანაშაულის წინასწარ შეუპირებლად დაფარვის ფაქტებზე გამოძიება საქართველოს სისხლის სამართლის კოდექსის 344-ე მუხლის 1-ლი ნაწილით, 344-ე პრიმა მუხლის მესამე ნაწილის “ა” ქვეპუნქტით და 375-ე მუხლის მე-2 ნაწილით მიმდინარეობს. აქტიურ რეჟიმში ტარდება ყველა შესაბამისი საპროცესო და საგამოძიებო მოქმედება,” – აცხადებენ შსს-ში.

მსგავსი თემები