დღე: ივლისი 10, 2022

ამერიკის შეერთებული შტატების სახელმწიფო მდივანი აცხადებს, რომ უკრაინის ომთან დაკავშირებით ჩინეთი ნეიტრალურ პოზიციას არ ინარჩუნებს. როგორც ენტონი ბლინკენი ამბობს,  პეკინმა მხარი დაუჭირა რუსეთს გაეროში და ამით პრორუსული პროპაგანდა გააძლიერა. მისივე ინფორმაციით, აღნიშნული საკითხი ჩინეთის საგარეო საქმეთა მინისტრთან ვან ი-სთან განიხილა. „ისევ ვუთხარი მინისტრს, რომ ჩვენ ჩინეთის სახალხო რესპუბლიკისა და რუსეთის დაახლოება გვაწუხებს“ – აცხადებს ბლინკენი და დასძინა, რომ უახლოეს პერიოდში აშშ-ის პრეზიდენტისა და ჩინეთის პრეზიდენტის საუბარი იგეგმება.  

„ვემზადები მომავალი კვირისთვის, იქნება მნიშვნელოვანი სიახლეები, მათ შორის ხელისუფლების წარმომადგენლებისგან“, – აცხადებს  უკრაინის პრეზიდენტი მორიგ ვიდეომიმართვაში. ვოლოდიმირ ზელენსკი ელჩების გათავისუფლების საკითხსაც შეეხო და აღნიშნა, რომ ეს მორიგი როტაცია იყო. „რუსეთი დარტყმებს საცხოვრებელ სექტორზე ახორციელებს. ეს ხდება აბსოლუტურად შეგნებულად, განზრახ, სახლების, სამოქალაქო ობიექტების, ხალხის წინააღმდეგ. არიან დაშავებულები, დაღუპულები, დაჭრილები. რუსული არტილერიის სასტიკი დარტყმები დონბასში ერთი დღეც არ წყდება – სლავიანსკის, ბახმუტის, ავდეევკას მიმართულებით“, – აცხადებს პრეზიდენტი. შეგახსენებთ, რომ პრეზიდენტმა ოთხი ქვეყნიდან ელჩები გაათავისუფლა.  

1,7 მილიარდი დოლარი ის თანხაა, რომელსაც უკრაინა უსასყიდლო გრანტის სახით მიიღებს. ეს კი რეკონსტრუქციისა და განვითარების საერთაშორისო ბანკისა (IBRD), საერთაშორისო განვითარების ასოციაციისა და USAID-ის ერთი დონორის ნდობის ფონდის მეშვეობით მოხდება, რომელიც ახლა შეიქმნა. ინფორმაციას უკრაინის პრემიერ-მინისტრი დენის შმიგალი ავრცელებს. პრემიერის ინფორმაციით, შეთანხმების პროექტი უკვე დამტკიცებულია. „გრანტის მოზიდვა  უკრაინის სახელმწიფო ბიუჯეტში უსასყიდლოდ მოხდება, უკან დაბრუნების გარეშე, USAID-სგან IBRD-ისა და IDA-ს მხარდაჭერით…  წლის ბოლომდე კი უკრაინა კიდევ 20 მილიარდიან  დახმარებას და მხარდაჭერას მიიღებს“ – განაცხადა პრემიერმა შმიგალმა.