დღე: თებერვალი 12, 2022

CNN-ის ინფორმაციით, საფრანგეთის პრეზიდენტის, ემანუელ მაკრონის განცხადებით, ქვეყანა 6 ბირთვულ რეაქტორს ააშენებს. ამასთან, განიხილება კიდევ 8-ის ექსპლუატაციაში ჩაშვების შესაძლებლობა. “ელექტროენერგიის საჭიროებების გათვალისწინებით, ვაპირებთ ახალი ბირთვული რეაქტორების პროგრამის დაწყებას. საფრანგეთს ბირთვული ინდუსტრიის აღორძინება სჭირდება”, – განაცხადა მაკრონმა. მისივე განცხადებით, სამშენებლო სამუშაოები 2028 წელს დაიწყება და 2035 წლისთვის დასრულდება.

პრეზიდენტი ზელენსკი დღეს ხერსონის ოლქში იმყოფებოდა, სადაც შინაგან საქმეთა სამინისტრომ და ეროვნულმა გვარდიამ ერთობლივი წვრთნები გამართეს. ჟურნალისტებმა ზელინსკის კითხეს, თეთრი სახლის მიერ აგვრცელებულ ინფორმაციაზე, რომ რუსეთის უკრაინაში შეჭრა გარდაუვალია. “ვთვლი, რომ საინფორმაციო სივრცეში ძალიან ბევრი ინფორმაციაა რუსეთთან სრულმასშტაბიანი ომის შესახებ, საუბრობენ თარიღებზეც. გვესმის, რომ საფრთხე არსებობს. ჩვენ ბევრ ინფორმაციას ვიღებთ და ვაანალიზებთ. მე ვერ დავეთანხმები ან უარვყოფ იმას, რაც ჯერ არ მომხდარა”, – განაცხადა ზელინსკიმ.

უკრაინის მიმართ რუსეთის აგრესიულ ქმედებებს საქართველოს მოქალაქეები აპროტესტებენ. ბათუმში,  ერას მოედანზე შეკრებილი სამოქალაქო აქტივისტები და ოპოზიცია მეგობარ ქვეყანას მხარდაჭერას უცხადებენ. ისინი ადგილზე უკრაინის დროშებითა და მიწაზე პუტინის პოსტერით არიან შეკრებილნი, რომელზეც ფეხით გადაადგილდებიან. “აქციის მონაწილეები ადგილობრივი ანტიპუტნისტო ოპოზიციონერი რუსები, ბელორუსები და უკრაინელები და ჩვენ, პარტია “დროა” ვართ. მთავარი მესიჯი არის, რომ რუსეთი არის მტერი, პუტინი არის აგრესორი”, – ამბობს აქციის წარმოამდგენელი. შეგახსენებთ, რომ რუსეთი უკრაინაში აგრესიულად შეჭრასთან ძალიან ახლოსაა. ბოლო ორი დღეა რუსეთი ქვეყნის საზღვრებთან სამხედრო მობილიზაციას აძლიერებს.  

უკრაინის საგარეო საქმეთა სამინისტრო მოსახლეობას სიმშვიდის შენარჩუნებისკენ მოუწოდებს და აცხადებს, რომ ხელისუფლება იღებს ყველა ზომას რუსეთის აგრესიული ქმედებების საწინააღმდეგოდ. უკრაინის საგარეო უწყების განცხადებით, ქვეყნის პრეზიდენტის, პარლამენტისა და მთავრობის გადაწყვეტილებების და პარტნიორების დახმარების წყალობით, უკრაინამ კიდევ უფრო გააძლიერა სახელმწიფოსა და უკრაინის მოქალაქეების უსაფრთხოების დაცვის უნარი. “გუშინ ეროვნული უსაფრთხოებისა და თავდაცვის საბჭოს სხდომაზე, რომელსაც უკრაინის პრეზიდენტი ვლადიმირ ზელენსკი ხელმძღვანელობდა, განხორციელდა უსაფრთხოების კუთხით არსებული მდგომარეობისა და უკრაინის შემდგომი ქმედებების საფუძვლიანი ანალიზი”, – ნათქვამია საგარეო უწყების განცხადებაში. საგარეო საქმეთა სამინისტრომ მოუწოდა მოქალაქეებს, შეინარჩუნონ სიმშვიდე და მოერიდონ ქმედებებს, რომლებიც ძირს უთხრის სტაბილურობას და თესავს პანიკას.…

Reuters-ის ინფორმაციით, აშშ-ის სახელმწიფო მდივნის ენტონი ბლინკენი და რუსეთის საგარეო საქმეთა მინისტრ სერგეი ლავროვი სატელეფონო საუბარს გამართავენ. “ჯერჯერობით, მოსკოვის მხრიდან ჩვენ მხოლოდ ესკალაციას ვხედავთ. გადამწყვეტი მომენტი დგას: მზად ვართ ყველაფრისთვის, რაც უნდა მოხდეს”, – განაცხადა ბლინკენმა. მისი თქმით, თუ ვლადიმერ პუტინი გულწრფელად არის დაინტერესებული მზარდი დაპირისპირების დიპლომატიური გზით მოგვარებით, ვაშინგტონი მზადაა, თავისი როლი შეასრულოს. “კვლავ ვიმედოვნებ, რომ ის არ აირჩევს აგრესიის გზას და აირჩევს დიპლომატიის და დიალოგის გზას, მაგრამ თუ პრეზიდენტი პუტინი გადაწყვეტს სამხედრო მოქმედებების განხორციელებას, ჩვენ, მთელ მსოფლიოში მოკავშირეებთან და პარტნიორებთან კოორდინაციით, სწრაფად დავაწესებთ მკაცრ ეკონომიკურ სანქციებს და დავეხმარებით…

კიევის საქალაქო ადმინისტრაციის პრესსამსახურის ინფორმაციით, დედაქალაქის მერმა ვიტალი კლიჩკომ განაცხადა, რომ კიევში, უკრაინის ტერიტორიაზე რუსეთის შეჭრის შემთხვევაში, მოსახლეობის ევაკუაციის გეგმა დაამტკიცდა. “კიევში შეიქმნა საევაკუაციო კომისიები – კიევის საქალაქო ადმინისტრაციის დონეზე და თითოეულ რაიონში. დამტკიცდა ევაკუაციის გეგმა. იგი განსაზღვრავს ევაკუაციის პუნქტების ადგილს, ტრანსპორტის საჭირო რაოდენობას და უსაფრთხო ტერიტორიებს მოსახლეობის განსახლებისთვის”, – აღნიშნულია კიევის საქალაქო ადმინისტრაციის ინფორმაციაში.

უცხოური მედიის ინფორმაციით, რუსეთის დიპლომატიური წარმომადგნლები უკრაინას ტოვებენ. ისინი რუსეთში გამგზავრებას იწყებენ. გუშინ ცნობილი გახდა, რომ რუსეთის მიერ უკრაინაში შეჭრის საშიშროების ფონზე რამდენიმე ქვეყანამ, მათ შორის აშშ-მა, გაერთიანებულმა სამეფომ, ნიდერლანდებმა, ლატვიამ, იაპონიამ, ავსტრალიამ და სამხრეთ კორეამ, უკრაინაში მყოფ საკუთარ მოქალაქეებს ქვეყნის დატოვებისკენ მოუწოდეს.

უკრაინის საგარეო საქმეთა მინისტრმა, დმიტრო კულებამ, საგარეო და უსაფრთხოების პოლიტიკის საკითხებში ევროკავშირის უმაღლეს წარმომადგენელთან, ჯოზეფ ბორელთან სატელეფონო საუბრის შემდეგ Twitter-ზე დაწერა, რომ რუსეთის წინააღმდეგ ევროკავშირის სანქციების პაკეტი მზად არის. “საუბარი მქონდა ჯოზეფ ბორელთან, რომელიც კონცენტრირებული იყო უსაფრთხოებასთან დაკავშირებულ მიმდინარე ვითარებაზე. დადასტურებულია: რუსეთის წინააღმდეგ მძიმე სანქციების პაკეტი მზად არის. ევროკავშირი დამატებით ძალისხმევას გამოიყენებს უკრაინის პოლიტიკური, ფინანსური მხარდაჭერისთვის. მადლობელი ვარ მტკიცე პოზიციისთვის და გადამწყვეტი მოქმედებებისთვის მზადყოფნისთვის”, – წერს დმიტრო კულება.

დღეს ამერიკის შეერთებული შტატების პრეზიდენტ ჯო ბაიდენსა და რუსეთის პრეზიდენტ ვლადიმერ პუტინს შორის სატელეფონო საუბარი გაიმართება. კრემლის პრესსპიკერის, დიმიტრი პესკოვის განცხადებით, სატელეფონო საუბრის გამართვა ამერიკულმა მხარემ ითხოვა. ჯეიკ სალივანმა, რომელიც აშშ-ს ეროვნული უსაფრთხოების მრჩეველია,  მანამდე ბრიფინგზე აღნიშნა, რომ ორ პირს შორის სატელეფონო საუბარი გაიმართებოდა, თუმცა დრო არ დაუკონკრეტებია. აღსანიშნავია, რომ მხარეებმა ბოლოს დეკემბერში ისაუბრეს. პუტინთან დღესვე საუბარი იგეგმება საფრანგეთის პრეზიდენ ემანუელ მაკრონისთან.