დღე: აგვისტო 6, 2021

სამართალდამცველებმა 1995 წელს დაბადებული ლ.ხ. განზრახ მკვლელობის ბრალდებით დააკავეს. გამოძიებით ინფორმაციით, ალკოჰოლის ზემოქმედების ქვეშ მყოფმა ბრალდებულმა ლ.ხ.-მ, მიმდინარე წლის 6 აგვისტოს, კასპის მუნიციპალიტეტში, ურთიერთშელკაპარაკების ნიადაგზე, ცივი იარაღის გამოყენებით სამი ადამიანი დაჭრა და შემთხვევის ადგილიდან მიიმალა. სასწრაფო სამედიცინო დახმარების სამსახურმა სამივე დაჭრილი სამედიცინო დაწესებულებაში გადაიყვანა, რომელთაგანაც ერთ-ერთი – 1971 წელს დაბადებული გ.გ., სიცოცხლესთან შეუთავსებელი დაზიანების გამო, კლინიკაში მიყვანიდან რამდენიმე წუთში გარდაიცვალა. პოლიციამ ბრალდებული მომხდარიდან რამდენიმე საათში, ცხელ კვალზე დააკავა. განზრახ მკვლელობის ფაქტზე გამოძიება საქართველოს სისხლის სამართლის კოდექსის 108-ე მუხლით მიმდინარეობს. დანაშაული 7-დან 15 წლამდე ვადით თავისუფლების აღკვეთას ითვალისწინებს.

 ბორჯომში 40 წლამდე მამაკაცს ცივი იარაღით სასიკვდილო ჭრილობები მიაყენეს. დანით დაჭრილი მამაკაცი ადგილობრივ კლინიკაში საკუთარი ფეხით მივიდა, თუმცა ექიმებმა მისი გადარჩენა ვერ შეძლეს. შინაგან საქმეთა სამინისტრომ ფაქტზე გამოძიება სისხლის სამართლის კოდექსის 108-ე მუხლით დაიწყო, რაც განზრახ მკვლელობას გულისხმობს. დამნაშავე ადგილიდან მიიმალა.

საგანგებო სიტუაციების მართვის სამსახურის მეხანძრე-მაშველებმა, ამერიკის შეერთებული შტატების თავდაცვის უწყებასთან თანამშრომლობით სწრაფ წყლებში სამაშველო ოპერაციების სწავლება გაიარეს. მდინარე მტკვარში ჩატარებულ სწავლებაში 30 მეხანძრე-მაშველი, ორ ჯგუფად მონაწილეობდა. ამერიკელმა ინსტრუქტორებმა ორი კვირის განმავლობაში, წყალზე სამაშველო ჯგუფის წევრებს სპეციალური პრაქტიკული კურსი ჩაუტარეს, რომლის მიზანი სწრაფ წყლებში სამაშველო ოპერაციების ჩატარების და წყლიდან მოქალაქის დროულად და უვნებლად გამოყვანის კუთხით ჯგუფის შესაძლებლობების გაუმჯობესება იყო. წვრთნების დასრულებისადმი მიძღვნილი ღონისძიების დასასრულს აშშ-ის ელჩმა საქართველოში კელი დეგნანმა, საგანგებო სიტუაციების მართვის სამსახურის უფროსმა თემურ მღებრიშვილმა და გენერალ-მაიორმა ტომას კარდენმა სწავლების მონაწილეებს მიღებული ცოდნის დასადასტურებლად სპეციალური სერთიფიკატები გადასცეს.

მკვლელობა მოხდა კასპის რაიონის სოფელ ახალქალაქში. “არსებული” ინფორმაციით, ლუდის ჯიხურთან დაწყებული სიტყვიერი შელაპარაკება 50 წლის მამაკაცის მკვლელობით დასრულდა. ჩვენი ინფორმაციით, ასევე დაჭრილია ორი ადამიანი, რომლებიც სასწრაფო დახმარებამ კლინიკაში გადაიყვანა.  მკვლელი ადგილიდან მიიმალა, თუმცა ის პოლიციას უკვე იდენტიფიცირებული ჰყავს.

ახალქალაქში, სოფელ ტურცხის ტბაში თევზები დაიხოცნენ. ადგილობრივების თქმით, ტბას წყალსაცავად იყენებენ და ის თითქმის დამშრალია. ფაქტის ამსახველ ფოტოებს „ფეისბუქზე“ მომხმარებელი არსენ კარაპეტიანი ავრცელებს.

ნადირობის სეზონი 28 აგვისტოს გაიხსნება. ინფორმაციას ამის შესახებ გარემოს დაცვისა და სოფლის მეურნეობის სამინისტრო ავრცელებს. უწყების ინფორმაციით, გადამფრენ ფრინველებზე ნადირობის მსურველი ვალდებულია: „ნადირობამდე გადაიხადოს „ბუნებრივი რესურსებით სარგებლობისათვის მოსაკრებლების შესახებ“ საქართველოს კანონით გათვალისწინებული გარემოდან გადამფრენი ფრინველების ამოღებაზე დაწესებული მოსაკრებელი (10 ლარი); გადახდიდან შვიდი დღის (გადახდის დღის ჩათვლით) განმავლობაში ნადირობის შემთხვევაში, თან იქონიოს ამ მოსაკრებლის გადახდის დამადასტურებელი დოკუმენტი მატერიალური ან ელექტრონული ფორმით; ნადირობისას, თან იქონიოს საქართველოს შინაგან საქმეთა სამინისტროს შესაბამისი ორგანოს მიერ გაცემული შესაბამისი სანადირო თოფის შენახვისა და ტარების უფლების დამადასტურებელი დოკუმენტი; მოსაკრებლის გადახდა შესაძლებელია საქართველოს ნებისმიერ ბანკში, მიმღების ბანკი: სახელმწიფო ხაზინა,…

შეფასებისა და გამოცდების ეროვნულ ცენტრში აბიტურიენტების სააპელაციო განაცხადების მიღება დღეიდან დაიწყება. აბიტურიენტებს შეუძლიათ ცენტრს 10 აგვისტოს 18:00 საათამდე მიმართონ. სააპელაციო განაცხადები მხოლოდ ელექტრონულად ვებ-გვერდებზე – www.naec.ge და online.naec.ge მიიღება. აპელაციის დროს ნაშრომები დამოუკიდებელი კომისიის მიერთავიდან სწორდება. გამოსაცდელებს შესაძლებლობა ექნებათ, გაასაჩივრონ, როგორც ერთი ან რამდენიმე დავალება, ასევე მთლიანი ტესტი. ერთი გამოცდის შედეგის გასაჩივრების საფასურია 50 ლარი. ქულის მომატების ან დაკლების შემთხვევაში თანხა უკან დაბრუნდება.