დღე: აგვისტო 21, 2020

რუსთავში ქალს, რომელიც ზებრა გადასასვლელზე გადადიოდა მანქანა დაეჯახა. თვითმხილველების თქმით, ახალგაზრდა ქალმა ბავშვის გზის სავალი ნაწილიდან გადაგდება მოახერხა, ხოლო თავად გადასვლა ვეღარ მოასწრო. დაშავებული სასწრაფო-სამედიცინო ბრიგადამ კლინიკაში გადაიყვანა. ექიმის ინფორმაციით მისი ჯანმრთელობის მდგომარეობა მძიმეა, იმყოფება მართვით სუნთქვაზე, აქვს მრავლობითი მოტეხილობები. “პაციენტი იმყოფებოდა კომაში, შემოსვლისთანავე გადაყვანილია მართვით სუნთქვაზე. ჩატარებულია კომპიუტერული ტომოგრაფია პოლიტრამვის რეჟიმში და აღენიშნება მრავლობითი დაზიანებები – თავის ტვინის დაჟეჟილობა, ფილტვების დაჟეჟილობა, მენჯის ძვლების მრავლობითი მოტეხილობა, დანარჩენი კვლევები გრძელდება. პაციენტი რეანიმაციულ განყოფილებაში იმყოფება,” – აღნიშნა ექიმმა ლელა გიგაშვილმა. მომხდარზე მიმდინარეობს გამოძიება.

ოკუპირებულ ცხინვალში საქართველოს უკანონოდ დაკავებული მოქალაქის, ხვიჩა მღებრიშვილის სასამართლო პროცესი დღეს, 13:00 საათისთვის განახლდება, – ამის შესახებ ცხელ ხაზზე შემოსულ ინფორმაციაზე დაყრდნობით, სუს-ის პრესსამსახურში განაცხადეს. მათი თქმით, საქმესთან დაკავშირებით გუშინ დილიდან ამოქმედებული იყო ევროკავშირის სადამკვირვებლო მისიის ცხელი ხაზი და ქართული მხარე მათგან ინფორმაციას პერიოდულად იღებდა. შეგახსენებთ, რომ საოკუპაციო ძალების წარმომადგენლებმა მეჯვრისხეველი ხვიჩა მღებრიშვილი 3 ივლისს დააკავეს. მას ბრალად ედება ე.წ. საზღვრის უკანონოდ გადაკვეთა. ე.წ. სამხრეთ ოსეთის დე ფაქტო უშიშროების კომიტეტმა მღებრიშვილის „ვიდეოაღიარებაც“ გაავრცელა, რომლის მიხედვით, ის ოკუპირებულ ტერიტორიაზე ღამურების დასაჭერად იყო გადასული და ამისთვის 5 000-დან 10 000 დოლარამდე ჰპირდებოდნენ.…