დღე: აპრილი 26, 2020

დაავადებათა კონტროლის ეროვნული ცენტრის ხელმძღვანელის მოადგილის, პაატა იმნაძის განცხადებით, შემთხვევების მატება ვლინდება იქ, სადაც 7-10 დღის წინ არ იყო დაცული რეკომენდაციები. ამასთან, იმნაძის ინფორმაციით, საფლავებზე გასვლა და სუფრებზე დღესასწაულის აღნიშვნაც დაფიქსირდა. „სამწუხაროდ, კიდევ ერთხელ ვიმეორებ, ის რომ გვაქვს შემთხვევების ასეთი მატება და გვაქვს შემთხვევების მატება იქ, სადაც, ჩვენი ინფორმაციით, დაახლოებით ერთი კვირის წინ, ათი დღის წინ არ იყო დაცული გაცემული რეკომენდაციები. ჩემი ინფორმაციით, მათ შორის, ადგილი ჰქონდა საფლავებზე გასვლასაც და სუფრებზე დღესასწაულების აღნიშვნას, ვიმკით იმ შედეგს, რაც გვაქვს“, – განაცხადა იმნაძემ.

თეთრიწყაროში კორონავირუსის 19 დადასტურებული შემთხვევაა. აქედან 12 უშუალოდ თეთრიწყაროს რაიონული ცენტრიდანაა. შესაბამისად, გადაწყდა, რომ თეთრიწყაროს რაიონული ცენტრი ჩაიკეტოს.  ამ წუთებში ე.წ. საკონტროლო-გამშვები პუნქტების განთავსება მიმდინარეობს. სულ თეთრიწყაროს რაიონულ ცენტრში ოთხი საკონტროლო-გამშვები პუნქტი განთავსდება კარანტინი გამოცხადდა თეთრიწყაროს საავადმყოფოში, რადგან დაინფიცირებული პირველი პაციენტი თეთრიწყაროს საავადმყოფოს ექთანია. მისი დაინფიცირების წყარო უცნობია. სწორედ ექთნის კონტაქტებია 18 პირი.

ზუგდიდის ივერიის ღვთისმშობლის სახელობის მშენებარე საკათედრო ტაძარში ზუგდიდ-ცაიშისა და ავსტრია-გერმანიის მიტროპოლიტმა გერასიმე შარაშენიძემ ​კვირაცხოვლობის მნიშვნელობაზე ისაუბრა და აღნიშნა, რომ ზიარების წესში ცვლილებების შეტანა არ იგეგმება. „გავუფრთხილდეთ ჩვენს ქვეყანას, ღვთისმშობლის წილხვედრს ქვეყანას, გავუფრთხილდეთ ერთმანეთს. ძალიან ცოტანი ვართ და გამეტებით ვწირავთ ერთმანეთს, გვიყვარდეს მოყვასი ჩვენი, ვითარცა თავი ჩვენი“, – ამის მიტროპოლიტმა ლიტურგიის დასრულების შემდეგ ქადაგებისას. მან მრევლს პასკები და სააღდგომო კვერცხები დაურიგა.

რუსული მედიის ინფორმაციით, ოკუპირებულ აფხაზეთში კორონავირუსით ინფიცირებული 95 წლის ქალი გარდაიცვალა. ხანდაზმული ქალი მკურნალობას გუდაუთის ჰოსპიტალში გადიოდა. გარდაცვალების მიზეზი კორონავირუსით გამოწვეული გართულებები და მრავალი ქრონიკული დაავადება გახდა.

შინაგან საქმეთა სამინისტრომ საგანგებო მდგომარეობის რეჟიმის დარღვევის 132 ფაქტი გამოავლინა. უწყების ცნობით, პოლიცია, საქართველოს მთავრობის მიერ საგანგებო მდგომარეობის ფარგლებში ზომების მნიშვნელოვანი გამკაცრების შესახებ მიღებული გადაწყვეტილების მოთხოვნების აღსრულების და ე.წ. კომენდანტის საათის ფარგლებში დაწესებული შეზღუდვების დამრღვევი პირების გამოვლენის მიზნით, 24-საათიან რეჟიმში მუშაობას განაგრძობს. „შინაგან საქმეთა სამინისტროს შესაბამისი დანაყოფების თანამშრომლები, ქვეყანაში კორონავირუსის გავრცელების აღკვეთისა და პრევენციის მიზნით, სამართალდარღვევის ყველა ფაქტზე ოპერატიულად რეაგირებენ. ბოლო 24 საათის განმავლობაში, სამართალდამცველების მიერ განხორციელებული მონიტორინგის შედეგად, მთელი ქვეყნის მასშტაბით, საგანგებო მდგომარეობის რეჟიმის და ე.წ. კომენდანტის საათის შეზღუდვების დარღვევის 132 ახალი ფაქტი გამოვლინდა. პოლიციამ, 25 აპრილის 21:00 საათიდან 26 აპრილის…

საქართველოში კორონავირუსისგან კიდევ ერთი პაციენტი გარდაიცვალა. ამის შესახებ პირველი საუნივერსიტეტო კლინიკის ხელმძღვანელმა, ლევან რატიანმა განაცხადა. „ამ ეტაპზე კლინიკაში 115 პაციენტი გვყავს. ინფიცირებულია 86 პაციენტი. რაც შეეხება რეანიმაციას, იქ შვიდი პაციენტია. მამაკაცთან მიმართებაში, რომელზეც გუშინ ვაცხადებდი, რომ იყო მძიმე მდგომარეობაში, დღეს ბიოლოგიური სიკვდილი დადასტურდა. ასაკით 83 წლის იყო, ქრონიკული პათოლოგიებით –  გულის უკმარისობა, მოციმციმე არითმია. ჩატარებული ღონისძიებები აღმოჩნდა უშედეგო“, – განაცხადა ლევან რატიანმა. ამ დროის მონაცემებით, საქართველოში ექვსი პაციენტია გარდაცვლილი.

რაჭა-ლეჩხუმსა და ქვემო სვანეთში სახელმწიფო რწმუნებულის, არჩილ ჯაფარიძის ინფორმაციით, კორონავირუსისგან პირველი პაციენტი გამოჯანმრთელდა.  ლენტეხში პირველ გამოჯანმრთელებულ პაციენტს კორონავირუსი 5 აპრილს დაუდასტურდა. ლენტეხში ინფიცირების სულ ხუთი შემთხვევა არის დაფიქსირებული, რის გამოც მუნიციპალიტეტში მკაცრი საკარანტინო რეჟიმი მოქმედებს.