დღე: აპრილი 20, 2020

ინფექციონისტ მაია ბუწაშვილის განცხადებით, მიუხედავად იმისა, რომ ჩაკეტილი ყოფნა ძალიან რთულია, ხანდაზმული ადამიანები მაინც სახლში უნდა დარჩნენ. „მიუხედავად იმისა, რომ დიდხანს სახლში ჩაკეტვას გასაგებია, რომ შეიძლება გარკვეული უარყოფითი შედეგები მოჰყვეს, მაგრამ ხანდაზმულებისთვის ეს ვირუსი იმდენად საშიშია, რომ მათ გარეთ გასვლას არ ვურჩევთ“, – აღნიშნა ინფექციონისტმა

“მიღებულმა ღონისძიებებმა შედეგი გამოიღო, თორემ ახლა სერიოზული პიკი გვექნებოდა”, – ამის შესახებ ინფექციონისტმა მარინა ენდელაძემ განაცხადა. ინფექციონისტმა ასევე აღნიშნა, რომ მოსახლეობა ამ საკითხს შეგნებულად მიუდგა და უმეტესობა მართლაც სახლში დარჩა. „ამიტომ არის, რომ ეს ორი-სამი დღე არ არის დიდი მატება, როცა ამ პერიოდისათვის თუ არ იქნებოდა ყველა რეკომენდაცია დაცული, რა თქმა უნდა, დაიწყებოდა პიკის მონაცემები. პიკის განსაზღვრა ასე ადვილი არ არის, ეს მოსახლეობაზეა დამოკიდებული – მგონია, რომ აღდგომის დღეები კარგად გადავაგორეთ და ასე უნდა გავაგრძელოთ“, – განაცხადა მარინა ენდელაძემ.

სრულიად საქართველოს კათოლიკოს-პატრიარქის კურთხევით სამღვდელოებამ მცხეთა-თბილისსა და რუსთავში არსებული სასაფლაოები აკურთხა. სასაფლაოები იკურთხა ეპარქიებშიც. დღეს მიცვალებულთა ხსენების დღეა. ამასთან დაკავშირებით ტაძრებში, საღმრთო ლიტურგიაზე მიცვალებულთა სულები მოიხსენიეს და პანაშვიდი გადაიხადეს. ამ დღეს, როგორც წესი, მოქალაქეები საფლავებზე გადიან, თუმცა წელს, კორონავირუსის საფრთხის გამო დედაქალაქსა და რეგიონებში სასაფლაოებს სამართალდამცველები აკონტროლებდნენ. 17 აპრილს როგორც რეგიონების, ასევე, თბილისის 56-ვე მუნიციპალური სასაფლაო ათი დღით დაიკეტა. ეს გადაწყვეტილება საკოორდინაციო საბჭომ მიიღო.

საქართველოში კორონავირუსის დადასტურებულ შემთხვევათა რაოდენობა 402-მდე გაიზარდა. ინფორმაცია ოფიციალურ ვებგვერდზე stopcov.ge რამდენიმე წუთის წინ განახლდა.  გაიზარდა ასევე გამოჯანმრთელებული პაციენტების რაოდენობა და ამ დროისთვის ქვეყანაში COVID-19-გან უკვე 95 პაციენტი განიკურნა. გარდაცვლილია – 4. 

საქართველოში კორონავირუსისგან გამოჯანმრთელებულთა რიცხვი კიდევ ორით გაიზარდა. ამ დროის მონაცემებით, ვირუსისგან გამოჯანმრთელებულია 95 მოქალაქე. ამასთან, უკვე დადასტურებულია კორონავირუსის 402 შემთხვევა. გარდაცვლილია ოთხი პაციენტი.

ბათუმის ერთ-ერთ სასტუმროში მოწყობილ საკარანტინო სივრცეში საკვებით მასობრივი მოწამვლის შემთხვევა დაფიქსირდა. შემთხვევა ორი დღის წინ მოხდა. „50-მდე პირის საკვებისმიერი მოწამვლის შემთხვევა დაფიქსირდა. ეს იყო ორი დღის წინ. ორი მათგანი იყო საყურადღებო, რომლებიც კლინიკაში გადაიყვანეს, თუმცა, დახმარების აღმოჩენის შემდეგ, კვლავ კარანტინში დაბრუნდნენ. სხვა შემთხვევები იყო მსუბუქი. შემთხვევას სურსათის ეროვნული სააგენტო იკვლევს. ამის შემდეგ გახდება ცნობილი, რამ გამოიწვია ინტოქსიკაცია“, – განაცხადა აჭარის ჯანდაცვის მინისტრის მოადგილემ, ნინო ნიჟარაძემ. მისივე ინფორმაციით, ყველა მოქალაქე თავს კარგად გრძნობს. გამოკვლევის შემდეგ, არც ერთ მათგანს კორონავირუსი არ დაუდასტურდა.

დაავადებათა კონტროლის ეროვნული ცენტრის ხელმძღვანელი ამირან გამყრელიძე აცხადებს, რომ ქვეყანაში ახალი კორონავირუსის გავრცელების პიკური ეტაპი ჯერ არ დამდგარა და მომავალი სამი-ოთხი კვირა საკმაოდ რთული იქნება. „ზრდა არის დუნე, რადგან ჯერ პიკი არ არის. ჩვენ შიდა გავრცელების შემთხვევები გვაქვს უკვე 22-23 მარტიდან, ამიტომ როგორც წესი, შემდგომი შვიდი-რვა კვირა, როცა შიდა გავრცელება იწყება, არის ხოლმე რთული, ამიტომ ყველა უნდა მოეკიდოთ ძალიან მაღალი სიფრთხილით მომავალი სამი-ოთხი კვირის განმავლობაში თქვენს ქცევებს. თუ გვინდა, რომ ნაკლები დაზიანებით გადავიაროთ ეს პიკური პერიოდი, მაქსიმალურად დაიცავით ის რეკომენდაციები, რასაც დაავადებათა კონტროლის ეროვნული ცენტრი და სახელმწიფო იძლევა“,- განაცხადა ამირან გემყრელიძემ.

პირველი საუნივერსიტეტო კლინიკის ხელმძღვანელის, ლევან რატიანის ინფორმაციით, კორონავირუსი სხვადასხვა გენოტიპში, სხვადასხვა ფენოტიპურ გამოვლინებებს იწყებს. ლევან რატიანის ვარაუდით, ჩვენი გენეტიკა აქტიურია და სწორედ ეს შეიძლება იყოს მიზეზი ქვეყანაში ინფიცირების დაბალი მაჩვენებლის. „არსებობს გეოგრაფია და ამ გეოგრაფიის ფარგლებში მცხოვრები ადამიანები. სხვადასხვა გარემოზე ვართ ადაპტირებული. სწორედ ესაა ორგანიზმის მდგრადობის გამოვლინება. სიმართლე გითხრათ, ჩვენი გენეტიკა ადრენალდამოკიდებულია, ანუ მოდუნებულები კი არა, აქტიურები ვართ. შესაძლებელია, ესეც განაპირობებდეს ჩვენს ქვეყანაში ვირუსზე ასეთ გამოვლინებას. ახლა ჩვენ ვართ პიკის ეტაპზე, უამრავი დასნეულებული პაციენტი უნდა გვყავდეს, მაგრამ საბედნიეროდ, არ გვყავს – ამას რაღაც ფაქტორი განაპირობებს, რომელიც არ ვიცით და აუცილებლად გვეცოდინება“, – განაცხადა ლევან რატიანმა.