დღე: აპრილი 4, 2019

„თავდაცვისუნარიანობისთვის სპორტი ყველაზე მნიშვნელოვანი კომპონენტია, აქედან გამომდინარე, სახელმწიფოსთვის უპირველესი პრიორიტეტი უნდა იყოს. უნდა ვიზრუნოთ ჯანსაღი ცხოვრების წესის დანერგვაზე“,- ამის შესახებ სპორტისა და ახალგაზრდულ საქმეთა კომიტეტის თავმჯდომარის პირველმა მოადგილემ, შოთა ხაბარელმა, პლენარულ სხდომაზე განაცხადა, სადაც თავდაცვის მინისტრს „მინისტრის საათის ფორმატში“ მოუსმინეს. შოთა ხაბარელის აზრით, დღეს ქვეყნისთვის გამოწვევაა ის, რომ წვევამდელთა 30% სამხედრო სამსახურისთვის უვარგისია. კომიტეტის თავმჯდომარის პირველი მოადგილის განცხადებით, მნიშვნელოვანია, რომ ეს კომპონენტი თავდაცვის სამინსიტროს ბიუჯეტში გათვალისწინებული იყოს.  „წვევამდელთა „დაბრაკვის“ მაღალი მაჩვენებელი ახალგაზრდობის ცხოვრებაში სპორტის ნაკლებობით აიხსნება. ეს არის მართლაც დიდი გამოწვევა და სათანადო უნდა გავამახვილოთ ამაზე ყურადღება. სპორტი არის არა მარტო სპორტი, ეს არის თავდაცვისუნარიანობისთვის ყველაზე მნიშვნელოვანი კომპონენტი. ჯანსაღი ცხოვრების წესის დანერგვა უნდა გავხადოთ პრიორიტეტული და ამ მხრივ თანხები არ უნდა დავიშუროთ. ჩვენ მიზანია, ჯანმრთელი და  ჯანსაღი ახალგაზრდები მოხვდნენ ჩვენს ჯარში. მათ უნდა დაიცვან ჩვენი უსაფრთხოება. ვფიქრობ, რომ ამ მიმართულებით ძალიან დიდი ყურადღებაა გასამახვილებელი“,- განაცხადა შოთა ხაბარელმა.

საპარლამენტო უმრავლესობის წევრი ვანო ზარდიაშვილი პარლამენტის პლენარულ სხდომაზე, სადაც პარლამენტარებმა თავდაცვის მინისტრს, ლევან იზორიას მოუსმინეს, ოპოზიციის მხრიდან სახელმწიფო სამხედრო სამეცნიერო-ტექნიკური ცენტრის ,,დელტას“ მიმართ გახმოვანებულ ბრალდებებს ეხმიანება. დეპუტატი კოლეგებს ურჩევს, კანონი წაიკითხონ, სადაც მკაფიოდ არის განმარტებული, რომსამხედრო და ორმაგი დანიშნულების წარმოებასთან დაკავშირებული ყველა კომპონენტი და საკითხი საიდუმლოა. ,,ჩემს კოლეგებს საქართველოს მოსახლეობა განზრახ შეჰყავს შეცდომაში. მარტივი ლოგიკა  თუ არ გააჩნიათ, კანონი წაიკითხონ, სადაც მკაფიოდ არის  განმარტებული, რომ სამხედრო და ორმაგი დანიშნულების წარმოებასთან დაკავშირებული ყველა კომპონენტი და საკითხი საიდუმლოა. კითხვა მე აქ უფრო იმ მიმართულებით მიჩნდება -რატომ ხდება ჩვენი სამხედრო წარმოების საიდუმლო ინფორმაციის გახმოვანება? ასეთი არაპროფესიონალიზმი შეურაცხმყოფელია. წინა ხელისუფლების პირობებში „დელტას” გაყიდვები ნულს უტოლდებოდა, დღეს კი მისი პროდუქცია სხვადასხვა ქვეყნებში გადის. ამერიკაში გაიყიდა ჩვენი სეტყვის საწინააღმდეგო სისტემა. არაა გასაკვირი, რომ  ოპოზიციას ეს წარმატება ნეგატიური  ტყუილებით უნდათ რომ გადაფაროს“,- განაცხადა ვანო ზარდიაშვილმა დეპუტატის თქმით, „თბილავიამშენის“ დირექტორი არის კორნელის უნივერსიტეტის წარჩინებული კურსდამთავრებული, ბიზნეს ადმინისტრირების მაგისტრი და მისი  გადმოყვანა “თბილავიამშენში” დიდი ძალისხმევისშედეგად მოხდა.