“ხომ არ მოგწონთ? ისე არ მომწონს ჩემი ოჯახის წინააღმდეგ ცილისწამება, გგონიათ, რეზინის შვილები მყავს?!” – კალაძე ე. წ. “სისხლიან ბანერებზე”

დედაქალაქის მერი კახა კალაძე ე. წ. “სისხლიანი ბანერების”  თბილისის ქუჩებში კვლავ გამოჩენის საკითხს ეხმაურება, რომელზეც ოპოზიციის რამდენიმე ლიდერია გამოსახული წარწერით – “არა ნაცებს, არა ბოროტებას! არა ღალატს!”.   

“მე პირადად არ მომწონს ეს. ჩემი საარჩევნო კამპანია მაქვს, ყოველთვის ვესაუბრები საზოგადოებას სამომავლო გეგმებზე. ვესაუბრები გამოწვევებზე. დღეს, მაგალითად პრეზენტაცია მქონდა, თუ რას ვაპირებ მომდევნო 4 წლის განმავლობაში სოციალური და ჯანდაცვის მიმართულებით. ისიც გაირკვა ვინ გამოაკრა, ამასთან დაკავშირებითაც არსებობს ინფორმაცია. მერია არაფერ შუაშია, არანაირი უფლება არ აქვს მერიას ბანერის ჩამოხსნის, ან დაკიდების. არაფერი რეაგირება არ იქნება, ყველას აქვს გამოხატვის უფლება კანონის ფარგლებში, არის კომპანია “ალმა”, გაგიგიათ ამასთან დაკავშირებით? რომლის საკუთრებაა ეს ბანერები და ისინი იღებენ გადაწყვეტილებას. მერიას არც გაკვრაში და არც ჩამოხსნაში არანაირი ვალდებულება და უფლება არ აქვს,” – აღნიშნავს კალაძე. 

ჟურნალისტის კითხვაზე, იმუშავებს, თუ არა “სისხლიანი ბანერები” წინასაარჩევნოდ, კახა კალაძე აღნიშნავს, რომ “ქართული ოცნება” მოწოდების სიმაღლეზეა, მისი ოჯახის წინააღმდეგ კი ცილისწამება მიმდინარეობს.

“ხომ არ მოგწონთ ეს, რაც გამოკრულია? ისე არ მომწონს მე, ისე არ მომწონს ის კამპანია, რომელსაც თქვენი ტელევიზიების საშუალებით თქვენივე პარტია ახორციელებს. შეგიძლიათ ჩართოთ ტელევიზორი და ნახავთ, საარჩევნო კლიპები, რაც არის შეურაცხყოფა, ცილისწამება, ბოროტება, სიძულვილის ენა, ეს ხართ თქვენ. მაშინ რატომ არ იღებთ ენას?! რატომ არ საუბრობთ ამაზე?! სასიამოვნოა?! “ქართული ოცნება“ და კახა კალაძე არაფერს აკეთებს. “ქართული ოცნება” დგას მოწოდების სიმაღლეზე, ვერ ნახავთ ჩემ განცხადებას, ოპონენტის, ან ვინმეს წინააღმდეგ სიძულვილის ენა გამომეყენებინოს საარჩევნო კამპანიის დროს განსაკუთრებით. თქვენ, ერთხელ არ გამოსულხართ, ჩემი ოჯახის წინააღმდეგ მიდის ეს ცილისწამების ვიდეო, ჩემი შვილები რა, რეზინის შვილები მყავს გგონიათ?! ეს არის რეალობა!” – აღნიშნავს კალაძე. 

 ე. წ. “სისხლიანი ბანერები” თბილისის ქუჩებში ისევ გამოჩნდა. პოლიტიკური განაცხადის უკან ბიზნესმენი მიხეილ გაბრიაძე დგას.

მსგავსი თემები