12 ოქტომბერს, 17:00 საათზე, კახეთში, მეღვინეობა შილდაში საქართველოს სამეფო ოჯახის წევრი, პრინცი იოანე ბაგრატიონი სამეფო ღვინის ახალ ბრენდს “პრინცი იოანე ბაგრატიონს” წარადგენს.
პრინცი იოანე ბაგრატიონის მთავარი მიზანი, პრემიუმკლასის ღვინის შექმნით, ქვეყანაში ღვინის წარმოების გამდიდრება და საკუთარი წვლილის შეტანა ქართული მეღვინეობის მრავალსაუკუნოვან კულტურაში.
“დახვეწილი, წარსულის ინოვაციური ხედვით შთაგონებული “პრინცი იოანე ბაგრატიონის” პრემიუმ კლასის ღვინო მემკვიდრეობის სიყვარულისა და წმინდა ტრადიციების პატივისცემის სიმბოლოდ შეიქმნა.
საგულისხმოა, რომ საქართველოში მეღვინეობა 8 000 წლის წინ დაიწყო, რამაც UNESCO-ს მიერ საქართველოს ღვინის აკვნად აღიარება განაპირობა. ბაგრატიონთა საგვარეულო ერთ-ერთი უძველესი სამეფო დინასტიაა მსოფლიოში. აღსანიშნავია, რომ ოჯახს ქართული ღვინის წარმოებაში შეტანილი უმნიშვნელოვანესი წვლილის ხანგრძლივი ისტორია აქვს. სამეფო ოჯახის იძულებითი ემიგრაციის გამო, პრინცი იოანე დაიბადა და გაიზარდა ქალაქ მადრიდში.
2014 წელს იგი თავის მშობლიურ ფესვებს დაუბრუნდა. პრინცი იოანე იცავს ქართული მეღვინეობის ტრადიციულ მეთოდებს და ამავდროულად სძენს ახალ სიცოცხლესა და ინოვაციას. მას სჯერა, რომ მისი ხედვა ჰარმონიაში მოდის მეღვინეობა შილდასთან – ღრმად ფესვგადგმული ტრადიციების პატივისცემა, სიახლისკენ მუდმივი სწრაფვა პრინცი იოანესა და მეღვინეობა შილდას თანამშრომლობის საწინდარია“, – ნათქვამია ორგანიზატორების მიერ გავრცელებულ ინფორმაციაში.
“მედიაცენტრი მთავარის” ინფორმაციით, აღნიშნული ბიზნესის უკან, სკანდალში გახვეული, ანა ბაგრატიონის ყოფილი მეუღლე – დავით ბაგბაგრატიონ-მუხრანელი დგას. სწორედ მას ეკუთვნის ვენახები კახეთში და მეუღლესთან დაპირისპირებისა და სასამართლო პროცესების გამო, ამ ეტაპზე, ჩრდილში ყოფნა არჩია.
