საქართველოს ეროვნული ოლიმპიური კომიტეტის საანგარიშო სესია 21 დეკემბერს, 17:00 საათზე “ივენთ ჰოლში“ (მელიქიშვილის ქუჩის N 1 -ში, საქართველოს სახელმწიფო ფილარმონია), გაიმართება.
2018 წლის საუკეთესო სპორტული შედეგების გათვალისწინებით, ნომინაციების მიხედვით გამოვლინდებიან საუკეთესოები – წლის სპორტსმენი ქალი, წლის ახალგაზრდა სპორტსმენი, წლის სპორტსმენი სპორტის ზამთრის სახეობაში, წლის აღმოჩენა – ოლიმპიური იმედი, წლის მწვრთნელი, ოლიმპიური მოძრაობის მედია მხარდამჭერი, წლის რეგიონალური ორგანიზაცია, ოლიმპიური სპორტის პარტნიორი.
სეოკ-ის აღმასკომის გადაწყვეტილებით, თავად სესიის დელეგატები კენჭისყრით გამოავლენენ მთავარ ნომინაციაში გამარჯვებულს – 2018 წლის საქართველოს საუკეთესო სპორტსმენს.
ნომინაციაში 2018 წლის საქართველოს საუკეთესო სპორტსმენი წარდგენილნი არიან : ლაშა ტალახაძე, გენო პეტრიაშვილი, გურამ თუშიშვილი, ნიკოლოზ ბასილაშვილი.
როგორც “მედიაცენტრ მთავარს” ეროვნული ოლიმპიური კომიტეტის საინფორმაციო სამსახურში განუცხადეს, სესიის პროგრამა მრავალფეროვანი, ინფორმაციულად დატვირთული და ვიზუალურად საინტერესო იქნება.
სესიას დაესწრებიან სპორტული უწყებების, ოლიმპიურ სახეობათა სპორტული ფედერაციების, სეოკ-ის რეგიონალური ორგანიზაციების ხელმძღვანელები, სეოკ-ის მიერ აღიარებული ასოციაციებისა და კავშირების წარმომადგენლები, ოლიმპიური ჩემპიონები, სეოკ-ის აღმასკომის წევრები, პარტნიორები, საპატიო სტუმრები.
დელეგატების წინაშე მოხსენებით წარსდგება სეოკ-ის პრეზიდენტი ლერი ხაბელოვი. ოლიმპიური ჩემპიონებს გადაეცემათ ბრწყინვალების საპრეზიდენტო ორდენები, საგანგებო პრიზებით დაჯილდოვდებიან სპორტული წლის ლაურეატები.
რეგისტრაცია დაიწყება 16:00 საათიდან.
ტელ: 599 58 00 01. თეონა ომანაძე