განათლების, მეცნიერების, კულტურისა და სპორტის სამინისტროს პატრონაჟით, საქართველოს ფრანგული ინსტიტუტი, საფრანგეთის, შვეიცარიის, კანადის, ბელგიის, რუმინეთისა და მოლდოვის საელჩოები სასკოლო და საუნივერსიტეტო დაწესებულებებთან ერთად, ფრანგული ენისა და ფრანკოფონიის დღეებს აღნიშნავენ. ამ დღესთან დაკავშირებით საქართველოში სხვადასხვა ღონისძიებები გაიმართა. განათლების, მეცნიერების, კულტურისა და სპორტის მინისტრის მოადგილე ირინა აბულაძემ, N23- ე საჯარო სკოლის წარმატებულ მოსწავლეებსა და მათ პედაგოგებს უმასპინძლა.
ღონისძიების ფარგლებში, ირინა აბულაძემ ფრანგულენოვან კონკურსებში წარმატებული მონაწილეობისა და გამარჯვებისთვის, მოსწავლეებსა და პედაგოგებს, ბელგიის სამეფოსა და ლუქსემბურგის დიდ საჰერცოგოში საქართველოს სრულუფლებიანი ელჩის და ევროკავშირთან საქართველოს მისიის ხელმძღვანელის, ნატალი საბანაძის სახელით, ფრანგული სახელმძღვანელოები და საჩუქრები გადასცა.
შეხვედრაზე მინისტრის მოადგილემ მოკლედ მიმოიხილა ფრანკოფონიის საერთაშორისო ორგანიზაციის საქმიანობა და აღნიშნა, რომ გაეროს წევრი ქვეყნების მოსახლეობის ერთი მესამედი და ხუთივე კონტინენტის 220 მილიონზე მეტი ადამიანი ფრანგულ ენაზე მეტყველებს, ფრანგულენოვანი მოსახლეობა კი, გერმანულენოვანი მოსახლეობის შემდეგ, ევროპაში ყველაზე მრავალრიცხოვანია. როგორც ცნობილია 23-ე საჯარო სკოლაში გაძლიერებულად ისწავლება ფრანგული ენა და საქართველოს ფრანგულ ინსტიტუტთან თანამშრომლობით, არაერთი ღონისძიება და კონკურსი იმართება. შეხვედრაზე ფრანგული ენის სწავლებასთან, ფრანგულენოვან კონკურსებთან დაკავშირებით და თავიანთ მოტივაციაზე მოსწავლეებმაც ვრცლად ისაუბრეს.
