თბილისის მერიის ინფრასტრუქტურის განვითარების საქალაქო სამსახურმა, ვაკის რაიონში, თბილისი-ნაფეტვრების დამაკავშირებელი გზის რეაბილიტაცია დაასრულა. მოწესრიგდა გზის საფარი, მოეწყო სანიაღვრე სისტემა, რომელიც წლების განმავლობაში სერიოზულ პრობლემას წარმოადგენდა. ძლიერი წვიმის დროს გზა ზიანდებოდა. გზის მეორე ნაწილი მცხეთის მუნიციპალიტეტს ეკუთვნის, სადაც სამუშაოებს რეგიონული განვითარებისა და ინფრასტრუქტურის სამინისტრო ახორციელებს.
დასრულებულ პროექტს თბილისის მერი კახა კალაძე, მოადგილე ირაკლი ბენდელიანთან ერთად გაეცნო.
როგორც კახა კალაძემ განაცხადა, რეაბილიტაციამდე აღნიშნულ მონაკვეთზე გრუნტის გზა არსებობდა და მოსახლეობას გადაადგილება უჭირდა.
„მოსახლეობის თხოვნა იყო, რომ აღნიშნულ ტერიტორიაზე გარე განათების ბოძები დაგვემონტაჟებინა. ჩვენ, დედაქალაქის მუნიციპალიტეტის ხელმძღვანელობა, ვიღებთ ამ პასუხისმგებლობას და უახლოეს მომავალში ეს გზა მთლიანად განათებული და მოწესრიგებული იქნება“, – განაცხადა კახა კალაძემ.
მისივე ინფორმაციით, პროექტის ფარგლებში, მოეწყო კიუვეტები, წყალმიმღები და წყალგადამშვები ჭები, რათა ასფალტის საფარზე წყალი არ დაგროვდეს. გზის საფუძვლის მოწყობის შემდეგ, ორ კილომეტრამდე მონაკვეთზე 14 000 კვ. მ ასფალტის საფარი დაიგო.
სამუშაოები, რომლის განხორციელებაზეც დედაქალაქის ბიუჯეტიდან 780 032 ლარი დაიხარჯა, კომპანია „ჯი არ ჯიმ“ განახორციელა.
თბილისი-ნაფეტვრების რეაბილიტირებული გზა კახა კალაძესთან ერთად, თბილისის მერიის ინფრასტრუქტურის განვითარების საქალაქო სამსახურის უფროსმა გალაქტიონ ბუაძემ, ვაკის რაიონის გამგებელმა ნოდარ ტურძელაძემ, ასევე, პარლამენტისა და საკრებულოს მაჟორიტარმა დეპუტატებმა,ზაზა ხუციშვილმა და გიორგი ბირბიჩაძემ დაათვალიერეს.
