პატიმრობაში მყოფი სახელმწიფო უსაფრთხოების სამსახურის უფროსის ყოფილ მოადგილეს, სოსო გოგაშვილს ადვოკატის ინფორმაციით, 28 ივლისს, ციხის საშხაპეში შს მინისტრსა და გომელაურს შორის საუბარი შედგა. როგორც რამაზ ჩინჩალაძე აცხადებს, საუბარი საკმაოდ დაძაბული იყო.
„28 ივლისს იოსებ გოგაშვილი, რომელიც მოთავსებულია მე-12 პენიტენციურ დაწესებულებაში გაიყვანეს ე.წ საშხაპეში, სააბაზანო ოთახში და მას მიუთითეს ფანჯრის რაფაზე განთავსებულ ტელეფონზე და უთხრეს, რომ ტელეფონი დარეკავდა და იოსებ გოგაშვილს ეპასუხა აღნიშნული ტელეფონისათვის. რამდენიმე წუთში ტელეფონზე განხორციელდა ზარი. იოსებ გოგაშვილმა, რა თქმა უნდა, უპასუხა და მას ესაუბრებოდა საქართველოს შინაგან საქმეთა მინისტრი.
როგორც იოსებ გოგაშვილი აცხადებს, საუბარი მათ შორის იყო საკმაოდ დაძაბული და ძირითადად აღნიშნული საუბარი შეეხებოდა მუქარებს – იმ შემთხვევაში თუ იოსებ გოგაშვილი არ გაჩუმდებოდა, გაეთვალისწინებინა თუ რა შეიძლება დამართნოდა როგორც იოსებ გოგაშვილს, ასევე მის ოჯახს, ახლობლებს და ა.შ“ – აცხადებს ადვოკატი.
მისივე თქმით, მინისტრმა გომელაურმა გოგაშვილს მეორე დღესაც დაურეკა და გაჩუმება მოსთხოვა.
„საუბარი შედგა იგივე წესით მეორე დღესაც. მეორე დღეს მოთხოვნა იყო გაჩუმებულიყო იოსებ გოგაშვილი, მისი ოჯახის წევრები და პირველი მოთხოვნა იყო, რომ იოსებ გოგაშვილის მანამდე გაჟღერებულ ინფორმაციებთან დაკავშირებით მიეწოდებინა მათთვის სასურველი ინფორმაცია. რადგან აუცილებელი იყო არამარტო იოსებ გოგაშვილის, არამედ მისი ოჯახის წევრების გაჩუმებაც, დაჰპირდნენ იოსებ გოგაშვილს, რომ მასთან მე-12 პენიტენციურ დაწესებულებაში შეიყვანდნენ ოჯახის წევრებს, რათა დალაპარაკებოდა იოსებ გოგაშვილი გაჩუმების თაობაზე. ცნობილია თუ რა ნომრიდან ხდებოდა იოსებ გოგაშვილთან დაკავშირება და ასევე, რა ნომერი იყო მოთავსებული იმ ტელეფონში, რომლითაც იგი პასუხობდა შს მინისტრს“, – განაცხადა ადვოკატმა ჩინჩალაძემ.
