თბილისის ღამის კლუბებში, გუშინ ღამით ჩატარებული სპეცოპერაციის შედეგად 8 დაკავებულს შორის ერთი ქალია, რომლის ასაკი 21-დან 30 წლამდეა.
ასევე, დაკავებულთა შორის ერთ-ერთი, კაფე “გალერის” დაცვის თანამშრომელი ვიქტორ ჟამუტაშვილი, მეტსახელად “ვიტოა“.
როგორც შინაგან საქმეთა სამინისტროში განმარტავენ, დაკავებულებს ბრალი სისხლის სამართლის კოდექსის 260-ე, ნარკოტიკული საშუალებების შეძენა-შენახვა-გასაღების მუხლით წარედგინათ, რაც თავისუფლების 8-დან 20 წლამდე აღკვეთას, ან უვადო პატიმრობას ითვალისწინებს.
შსს-ში დღეს გამართულ ბრიფინგზე ცენტრალური კრიმინალური პოლიციის დეპარტამენტის უფროსმა, ვლადიმერ ბოცვაძემ, განაცხადა, რომ კლუბში მყოფი პირების ერთმა ნაწილმა სისხლის სამართლის პასუხისმგებლობისგან გათავისუფლების გარანტიის სანაცვლოდ, ნარკოტიკული საშუალებები ნებაყოფლობით ჩააბარა.
მისივე ინფორმაციით, სპეცოპერაციის დროს ადმინისტრაციული წესით დაკავებული ყველა პირი უკვე თავისუფალია, ხოლო ნარკოტიკების რეალიზაციის ბრალდებით დაკავებული პირები წინასწარი დაკავების იზოლატორში იმყოფებიან.