თბილისში, ჭავჭავაძის გამზირზე, N359 ავტობუსში მგზავრმა მგზავრი დაჭრა. ამის შესახებ ინფორმაციას სოციალურ ქსელში ერთ-ერთი თვითმხილველი ავრცელებს.
როგორც, სოციალური ქსელის მომხმარებელი წერს, “საზოგადოებრივ ტრანსპორტში 65 წლის მამაკაცმა ურთიერთშელაპარაკების ნიადაგზე მოქალაქეს ორჯერ ესროლა. სიტყვიერი დაპირისპირება შენიშვნის ნიადაგზე დაიწყო, როცა ახალგაზრდა ბიჭმა 65 წლის კაცს მიუთითა, რომ მისი ზურგჩანთა უხეშად ეხებოდა მცირეწლოვანს.
კაცმა ბოდიში მოიხადა, თუმცა ახალგაზრდა ბიჭი არ შეეშვა.
დაპირისპირება 15-20 წუთი გაგრძელდა, რის შემდეგაც 65 წლის ოთხჯერ ნასამართლევმა (მისივე თქმით) კაცმა ორჯერ ესროლა ახალგაზრდა ბიჭს.
პოლიცია ავტობუსის გაჩერებიდან 6-7 წუთში მივიდა დანაშაულის ადგილზე, ხოლო ადამიანი, რომელმაც მიზანმიმართულად ორჯერ გაისროლა მეორე ადამიანის მისამართით ადგილიდან მშვიდად და აუღელვებლად მიიმალა“, – წერს სოციალური ქსელის მომხმარბელი ანა ქართლელიშვილი.
მომხდარზე უკვე დაკავებულია 65 წლის მამაკაცი. დაზარალებული კლინიკაშია გადაყვანილი, მას ქირურგიული ჩარევაც დაჭირდა. მომხდარზე მიმდინარეობს გამოძიება 2 მუხლით. ჯანმრთელობის განზრახ ნაკლებად მძიმე დაზიანება და ცეცხლსასროლი იარაღის შეძენა, შენახვა, ტარება.