უკრაინაში დელეგაცია სამი სამზე არ გამოდის, ფორმატი ფართოვდება

უკრაინაში საპარლამენტო დელეგაციის ვიზიტის შემადგენლობა ისევ შეიცვალა. თუ ადრინდელი შეთავაზება პარიტეტს – სამი სამზე (უმრავლესობა და ოპოზიცია) ითვალისწინებდა. ამჯერად, საუბარია რომ უმრავლესობიდან ისევ 3 წარმომადგენელი იქნება, ოპოზიციიდან კი თითო დეპუტატი.

ინფორმაციას პარლამენტის თავმჯდომარე ადასტურებს. როგორს შალვა პაპუაშვილი განმარტავს, ოპოზიციის წარმომადგენლებს თითო პოლიტიკური ჯგუფიდან  თითო წარმომადგენელი შესთავაზა.

„ჩემი სურვილი იყო, რომ პარლამენტის თავმჯდომარის დელეგაცია ყოფილიყო მრავალპარტიული – გვქონდა საუბარი ოპოზიციის წარმომადგენლებთან და შევთავაზეთ, ყოფილიყო  თანაბარი წარმომადგენლობა, თუმცა, არ იყო თანხმობა და შემდეგ, კვლავ შევთავაზეთ, რომ თითო პოლიტიკური ჯგუფიდან იყოს თითო წარმომადგენელი“,- ამის შესახებ საქართველოს პარლამენტის თავმჯდომარემ ბიუროს სხდომაზე, უკრაინაში უახლოეს დღეებში დაგეგმილ ვიზიტზე საუბრისას განაცხადა.

შალვა პაპუაშვილის თქმით, მას და უკრაინის რადას სპიკერს, შორის მეგობრული და თბილი საუბარი შედგა და რუსლან სტეფანჩუკმა ქართველი კოლეგა უკრაინაში კიდევ ერთხელ მიიწვია.

„ამ დღეების განმავლობაში მქონდა კომუნიკაცია უკრაინის რადას თავმჯდომარესთან, რუსლან სტეფანჩუკთან.  მეგობრული და თბილი საუბარი გვქონდა, ბევრ საკითხში გავერკვიეთ. მან დაადასტურა საკუთარი მიწვევა, რომ ვეწვიო უკრაინას და იქ გამოვხატოთ ჩვენი სოლიდარობა უკრაინელი ხალხის მიმართ.  ეს ვიზიტი, ალბათ, უახლოეს დღეებში შედგება. ახლა ვარკვევთ ორგანიზაციულ საკითხებს. ჩემი სურვილი იყო, რომ პარლამენტის თავმჯდომარის დელეგაცია ყოფილიყო მრავალპარტიული – გვქონდა საუბარი ოპოზიციის წარმომადგენლებთან. შეთავაზება გვქონდა, თანაბარი წარმომადგენლობა ყოფილიყო, თუმცა, არ იყო თანხმობა და შემდეგ, კვლავ შევთავაზეთ, რომ თითო პოლიტიკური ჯგუფიდან იყოს თითო წარმომადგენელი. მართალია, ამ შემთხვევაში, უმრავლესობამ თანხმობა განაცხადა, რომ თავის მხრივ, არ გაიზარდოს წარმომადგენლობა, თანაბრობის პრინციპი ამ შემთხვევაში დაირღვევა და ოპოზიციური უმრავლესობის დელეგაცია იქნება, თუმცა, გამომდინარე ამ ვითარებიდან, ეს შეთავაზება, ვფიქრობ, სწორი იყო და აქედან გამომდინარე, თხოვნა მექნება ოპოზიციის წარმომადგენლებთან, რომ დროულად მოგვაწოდონ საკუთარი კანდიდატები ამ დელეგაციისთვის. მექნება კომუნიკაცია ყველა პოლიტიკურ ჯგუფთან, ვინაიდან ორგანიზაციულად გვესმის ყველას, რომ არ არის ადვილი ამ ვიზიტის ორგანიზება, არის საკმაოდ საჩქარო საკითხი. იმედი მაქვს, რომ დღის პირველ ნახევარში ჩვენ ეს საკითხი უნდა გავარკვიოთ და ველი ყველა პოლიტიკური ჯგუფის მონაწილეობას“,- განაცხადა შალვა პაპუაშვილმა.

 

მსგავსი თემები