ძლიერი ქარის შედეგად, ბათუმში რამდენიმე სახლის სახურავი დაზიანდა. ჭავჭავაძისა და 26 მაისის ქუჩების კვეთასთან ქარმა, ცხრასართულიანი სახლის სახურავი მოგლიჯა. გადმოვარდნილი სახურავის ფრაგმენტების დაცემის შედეგად 2 ადამიანი დაშავდა, მათ შორის, ბათუმის მერიის წარმომადგენელი, რომელიც ადგილზე სამსახურებრივ მოვალეობას ასრულებდა.
როგორც “მედიაცენტრ მთავარს” ბათუმის მუნიციპალიტეტის მერიაში განუცხადეს, დაშავებულები სასწრაფო სამედიცინო დახმარების ბრიგადებმა საავადმყოფოში გადაიყვანეს. დაიწყო დაზიანებული სახურავების დროებითი გადახურვის სამუშაოები.
ადგილზე იმყოფებოდა ბათუმის მერი ლაშა კომახიძე. ქარის შედეგად ქალაქში რამდენიმე განათების ბოძი და ხე-მცენარეც დაზიანდა. მერიის შესაბამისი სამსახურები ადგილზე არიან მობილიზებულნი.
ქარს ძლიერი შტორმი მოჰყვა, შედეგად დანაგვიანდა ქალაქის სანაპირო ზოლი. დასუფთავების სამუშაოები შპს “სანდასუფთავების” მობილური ჯგუფები წევრები დილიდან ახორციელებენ.
