უკრაინის პრეზიდენტი ვლადიმირ ზელენსკი უკვე მერამდენედ ითხოვს ალიანსისგან მკვეთრ პასუხს – სურთ უკრაინის ნატოში მიღება თუ არა. როგორც პრეზიდენტმა მიუნხენის უსაფრთხოების კონფერენციაზე განაცხადა, ფრაზების – „კარი ღიაა“ გამეორებას ურჩევნია ღია პასუხი მიიღოს ალიანსისგან.
„რვა წლის წინ უკრაინელებმა არჩევანი გააკეთეს, ბევრმა სიცოცხლე გაწირა ამისთვის. რვა წლის შემდეგ უკრაინა მუდმივად უნდა ითხოვდეს ევროპული პერსპექტივის აღიარებას? 2014 წლიდან რუსეთის ფედერაცია გვარწმუნებს, რომ არასწორი გზა ავირჩიეთ, რომ ევროპაში არავინ გველოდება. განა ევროპამ გამუდმებით არ უნდა განაცხადოს და ქმედებებით გაამართლოს, რომ ეს ასე არ არის? არ უნდა თქვას ევროკავშირმა დღეს, რომ „ჩვენი მოქალაქეები დადებითად უყურებენ უკრაინის კავშირში გაწევრიანებას“? რატომ ვერიდებით ამ კითხვას? უკრაინა არ იმსახურებს პირდაპირ და გულწრფელ პასუხებს?“ – განაცხადა პრეზიენტმა კონფერენციაზე .
მისივე შეფასებით, ჯერჯერობით ამ საკითხზე კონკრეტული პასუხები არ ისმის.
„გვეუბნებიან, რომ კარი ღიაა, მაგრამ ჯერჯერობით, „აუტსაიდერებს“ არ უშვებენ. თუ ალიანსის ზოგიერთ წევრს ჩვენი ნახვა არ სურს, ან ალიანსის ყველა წევრს არ სურს ჩვენი ნახვა, იყავით გულწრფელი“ – აცხადებს პრეზიდენტი ზელენსკი.
