მიხეილ სააკაშვილი ოპოზიციას ბადრი ჯაფარიძის მხარდაჭერისკენ მოუწოდებს. პატიმრობაში მყოფი მიხეილ სააკაშვილი აღნიშნულთან დაკავშირებით გზავნილს ავრცელებს.
„ბადრი ჯაფარიძეს დაჩქარებულად მოუხსნეს დეპუტატის სტატუსი, ვინაიდან, ის იყო ის 50-ე და გადამწყვეტი ხმა, რომელიც საჭირო იყო ჩემი წამების კომისიის შესაქმნელად. ამიტომ, მე მის მიმართ განსაკუთრებული დამოკიდებულება მაქვს, მაგრამ ჩემს სუბიექტურ დამოკიდებულებაზე ბევრად მაღლა დგას ყველა ნამდვილი ოპოზიციური ჯგუფის ერთიანობის იდეა. არსად არავის მსოფლიოში არ დაუმარცხებია მაფიოზური რეჟიმები ყველას ერთიანობის გარეშე.
ამიტომ, მინდა მოვუწოდო ყველას, მხარი დაუჭიროს ბადრი ჯაფარიძის კანდიდატურას რუსთავში. ოღონდ ყველას უნდა გვახსოვდეს, რომ ბათუმშიც და რუსთავშიც გამარჯვება ვერ მიიღწევა, თუ მანამდე ქვეყანაში არ იქნება დიდი ტალღა სიღატაკის, ძარცვის, უსამართლობის, დაცინვის წინააღმდეგ და ეს ტალღა იქნება აუცილებლად უმოკლეს ხანში!“, – წერს სააკაშვილი.
შეგახსენებთ, რომ ბადრი ჯაფარიძე, რომელსაც პარლამენტმა მანდატი ვადაზე ადრე შეუწყვიტა, რუსთავის მაჟორიტარი დეპუტატობისთვის იბრძოლებს.
