„სამკურნალო საქმე გადაწყვიტონ ექიმებმა, პოლიტიკოსებმა გააკეთონ პოლიტიკა, ნუ შეუშლიან ექიმებს ხელს“ – დავით სერგეენკო

პარლამენტის ვიცე-სპიკერი დავით სერგეენკო პოლიტიკოსებს ურჩევს, ნუ ჩაერევიან ექიმების კომპეტენციაში და მისცენ მათ საშუალება, აკეთონ თავიანთი საქმე.     

„ყველასადმი მექნება სათხოვარი, მივცეთ ექიმებს მუშაობის საშუალება. იმ ადამიანებთან, ვინც ახლა შიმშილობს, უმორჩილესი თხოვნა და მოწოდება, რომ გამონახონ ძალა და თავის ჯანმრთელობას საფრთხეს ნუ შეუქმნიან და ვისურვებდი, რომ სამკურნალო საქმე გადაწყვიტონ ექიმებმა და პოლიტიკოსებმა გააკეთონ პოლიტიკა, პოლიტიკურ ინსტიტუციებში, ნუ შეუშლიან ექიმებს ხელს“ – ამის შესახებ დავით სერგეენკომ პარლამენტის პლენარულ სხდომაზე განაცხადა.

მისივე თქმით, აბსოლუტურ უმრავლეს შემთხვევაში, პოლიტიკოსები მსჯელობენ იმაზე, თუ როგორი უნდა იყოს სამკურნალო პროტოკოლი და ექიმები ამაზე ნაკლებად საუბრობენ.

„ის, რომ ადამიანის ჯანმრთელობა და სიცოცხლე ნებისმიერი საზოგადოებისთვის უმაღლესი ღირებულებაა, ამაზე არავინ დაობს, თუმცა, ნიშანდობლივია, რომ ყველა ადამიანის ჯანმრთელობა და სიცოცხლე თანაბრად მნიშვნელოვანია და ეს მმართველ ძალას ამ წლების განმავლობაში არა მხოლოდ დეკლარირებულად აქვს ნათქვამი, არამედ რეალური საქმით აქვს დადასტურებული.

ადამიანები, რომლებიც შიმშილობენ და თავიანთ ჯანმრთელობას და ზოგჯერ სიცოცხლეს უქმნიან საფრთხეს, მათ მაქსიმალური მოვლა სჭირდებათ და შესაბამისი სტანდარტის მონიტორინგი და მკურნალობა საჭიროების შემთხვევაში, თუმცა ის პარადოქსი თუ უცნაურობა, რაც შეიქმნა ბოლო პერიოდის განმავლობაში, აბსოლუტურ უმრავლეს შემთხვევაში, პოლიტიკოსები მსჯელობენ იმაზე, თუ როგორი უნდა იყოს სამკურნალო პროტოკოლი, რომელ სამედიცინო დაწესებულებაში უნდა მიიღოს მკურნალობა ამ შემთხვევაში კონკრეტულმა ადამიანმა და ექიმები ამაზე ნაკლებად საუბრობენ.

ჩვენ ამ პერიოდის განმავლობაში მჭიდრო მონიტორინგი გვქონდა, თუმცა, თავისთავად ცხადია, ეს მონიტორინგი და კომუნიკაცია უფრო ინტენსიური უნდა იყოს იმისათვის, რომ შესრულდეს ამოცანა- სამოქალაქო სექტორის ექიმებმა და სასჯელაღსრულების სისტემის ექიმებმა მონახონ საერთო ენა, რადგან საბედნიეროდ ისინი კოლეგები არიან, საბედნიეროდ ყველა სასიცოცხლო პარამეტრი და უკლებლივ ყველა ლაბორატორიულ -ინსტრუმენტული ტესტი არის თვლადი და უბრალოდ შეუძლებელია ორმაგი ინტერპრეტაციის გაკეთება“, – განაცხადა დავით სერგეენკომ.

მსგავსი თემები