პატიმარი პრეზიდენტის მამა მინისტრის მამას მიმართავს

პატიმრობაში მყოფი საქართველოს მესამე პრეზიდენტის  მამა, ნიკოლოზ სააკაშვილი იუსტიციის მინისტრის რატი ბრეგაძის მამას, გრიგოლ ბრეგაძეს  წერილით მიმართავს. ნიკოლოზ სააკაშვილი კოლეგას იმ წლებს ახსენებს, თუ როგორ წავიდა მიხეილ სააკაშვილის ხელშეწყობით ამჟამინდელი მინისტრი გერმანიაში სასწავლებლად და სთხოვს, მიხეილ სააკაშვილის მხარდასაჭერად საკუთარი პოზიცია დააფიქსიროს.  

„მედიაცენტრი „მთავარი“ ღია წერილს უცვლელად გთავაზობთ.

„გრიგოლ, გწერ როგორც კოლეგა კოლეგას, როგორც მშობელი მშობელს. ჩვენ მრავალი წელი ვმუშაობდით ერთად, ვემსახურებოდით ყველაზე ჰუმანურ იდეას – სიცოცხლის გადარჩენას. ჩვენ არასდროს ვარჩევდით პაციენტს მისი შეხედულებების ან რაიმე მიმდევრობის მიხედვით. ჩვენთვის პაციენტი ყოველთვის იყო პაციენტი, იმის მიუხედავად, ის პატიმარი იყო თუ არა. გრიგოლ, კარგად მახსოვს შენი სიხარული და სიამაყე, როდესაც შენი შვილი პრეზიდენტის სტიპენდიით გაემგზავრა გერმანიაში განათლების მისაღებად. იმ პრეზიდენტის, რომელსაც დღეს იუსტიციის სამინისტრო ართმევს სიცოცხლის უფლებას და არ გადაყავს სამოქალაქო კლინიკაში. არასდროს დამავიწყდება შენი აღტკინებული, ემოციური საუბარი ჩემთან, რასაც მე სიხარულით შევხვდი.

დღეს ქვეყნის პრეზიდენტი, ქართული სახელმწიფოს შემქმნელი, პატრიოტი ციხეშია. (ისტორია განსჯის სამართლიანად თუ არა) მე მიმაჩნია, რომ შენი მოქალაქეობრივი ვალია, როგორც ექიმის, ჰუმანისტის, მშობლის გამოხატო საზოგადოდ შენი დამოკიდებულება მოშიმშილე პაციენტის, სიცოცხლის შესანარჩუნებლად და დაუყონებლივ მის გადასაყვანად შიმშილობის შემდგომ სამოქალაქო სარეაბილიტაციურ ჰოსპიტალში. გრიგოლ, ღმერთმა დაგიფაროს ნამდვილად არ გისურვებ შენ მოხვდე ჩემ მდგომარეობაში. მე დაგიდგებოდი გვერდში, როგორც კოლეგა და ექიმი და უშიშრად გამოვხატავდი ჩემს პოზიციას!“ – წერია მიმართვაში.

მსგავსი თემები