ღამის ავტობუსის მარშრუტი „ახმეტელის თეატრიდან“ მეტროსადგურ „ვარკეთილამდე“

თბილისში, 8 მარტიდან, ყოველ პარასკევსა და შაბათს, ღამეს, 00:00-დან 06:00 საათამდე, მეტროსადგურ „ახმეტელის თეატრიდან“ მეტროსადგურ „ვარკეთილამდე“ ღამის ავტობუსი იმუშავებს.

როგორც თბილისის მერიაში “მედიაცენტრ მთავარს” განუცხადეს, საპილოტე მარშრუტზე „მანის“ მარკის ავტობუსები ერთსაათიანი ინტერვალით და სტანდარტული – 50-თეთრიანი ტარიფით იმოძრავებენ. ამასთანავე, შეღავათიანი მგზავრობის ტარიფიც იმოქმედებს.

მათივე ინფორმაციით, ღამის ავტობუსის პირველი გაჩერება დიდ დიღომში, სუპერმარკეტ „გუდვილთან“ ექნება. შემდეგ გაივლის აღმაშენებლის ხეივანს, მარშალ გელოვანის გამზირს, მტკვრის მარჯვენა სანაპიროსა და სააკაძის I გასასვლელთან გაჩერდება.

„ღამის ავტობუსი“ მარჯვენა სანაპიროს პანდუსით გმირთა მოედანზე აუხვევს, თამარ მეფის გამზირისკენ მობრუნდება და წინამძღვრიშვილის ქუჩის გავლით  სტადიონ „დინამო არენასთან“ მიიყვანს. სტადიონიდან გზას აღმაშენებლის გამზირისკენ განაგრძობს და მეტროსადგურ „მარჯანიშვილის“ მიმდებარედ გაჩერდება.

ამის შემდეგ, გაივლის მარჯანიშვილისა და ჯავახიშვილის (ყოფილი ელბაქიძის დაღმართი) ქუჩებს და მგზავრებს ჯერ პირველი რესპუბლიკის მოედანზე გაუჩერებს, ხოლო შემდეგ – თავისუფლების მოედანსა და ბარათაშვილის ქუჩაზე – „კონკასთან“.

ღამის ავტობუსი გადაკვეთს ბარათაშვილის ხიდს და მგზავრებს ევროპის მოედანზე მიიყვანს. იგი გზას გორგასალისა და გულუას ქუჩებისკენ განაგრძობს და აბანოებთან გაჩერდება. ორთაჭალის გავლის შემდგომ, ავტობუსს მორიგი გაჩერებები ექნება დოდაშვილის მოედანზე და მეტროსადგურ „ისანთან“.

ავტობუსი კახეთის გზატკეცილით ჯავახეთის ქუჩას დაუკავშირდება და მოძრაობას მეტრო „ვარკეთილთან“ დაასრულებს,” – განაცხადეს თბილისის მერიაში.

ღამის ავტობუსს გაჩერებები ექნება:​ მეტროსადგური „ახმეტელის თეატრი“; ფარნავაზ მეფის გამზირი (ჰიპერმარკეტი „გუდვილი“);მტკვრის მარჯვენა სანაპიროს და გიორგი სააკაძის I გასასვლელის გადაკვეთა;ვახუშტი ბაგრატიონისა და რაფაელ აგლაძის ქუჩების გადაკვეთა;სტადიონი „დინამო არენა“;დავით აღმაშენებლის გამზირი #106;პირველი რესპუბლიკის მოედანი;მეტროსადგური „თავისუფლების მოედანი“;ნიკოლოზ ბარათაშვილის ქ. „კონკა“;ევროპის მოედანი; გორგასალის მოედინი – გორგასალის ქ. #1-თან; ვახტანგ გორგასალის ქ. #7 – აბანოებთან;დოდაშვილის მოედანი;​მეტროსადგური „ისანი“; მეტროსადგური „ვარკეთილი“.

მსგავსი თემები