„ქალბატონ ლომჯარიას მერაბიშვილი კი არა, ნაწამები მოლაშვილი უნდა ახსენდებოდეს“ – კობა ნარჩემაშვილი

საპარლამენტო უმრავლესობის წარმომადგენელი კობა ნარჩემაშვილი, სახალხო დამცველ ნინო ლომჯარიას მოთხოვნას ეხმიანება და ამბობს, რომ შინაგან საქმეთა ექსმინისტრ ვანო მერაბიშვილის საქმეზე როდესაც საუბრობს, ამის პარალელურად უნდა ახსენდებოდეს “ნაციონალური მოძრაობის” ხელისუფლების დროს ნაგვემი და ნაწამები, კონტროლის პალატის ყოფილი თავმჯდომარე სულხან მოლაშვილი.

​როგორც კობა ნარჩემაშვილმა მედიაცენტრ “მთავარში“ სტუმრობისას დღეს განაცხადა, სახალხო დამცველის მოთხოვნას მხარს იმ შემთხვევაში დაუჭერს, თუ ის სულხან მოლაშვილის წამების საქმესაც კვალიფიციურად შეისწავლის.

“კარგად გახსოვთ, სულხან მოლაშვილის წამების საქმეზე გადაწყვეტილება  სტრასბურგში ც მიღებულია. გინდათ, ერთად გამოვიძიოთ სულხან მოლაშვილის წამების საქმე და მერაბიშვილის ციხიდან გაყვანა-არგაყვანა.  მინდა, რომ ქალბატონ ლომჯარიას სულხან მოლაშვილის წამებაც ახსენდებოდეს“ – განაცხადა კობა ნარჩემაშვილმა „მთავარის” პრესცენტრში.

დეპუტატის თქმით, მერაბიშვილის შემთხვევაში საუბარია მისი საკნიდან გაყვანაზე, მოლაშვილის შემთხვევაში კი წამებაზე, რომელსაც ეს ადამიანი გადაყვა. ამდენად, თუ სახალხო დამცველს სამართლიანობის დაცვა სურს, მხოლოდ მერაბიშვილის საქმე არ უნდა ახსენდებოდეს.

ამავე თემაზე მედიაცენტრმთავარში“ მოსაზრება გამოთქვა დეპუტატმა ზაქარია ქუცნაშვილმაც. მისი თქმით, პატიმრის საკნიდან გაყვანა და მისი უკან დაბრუნება ჩვეულებრივი მოვლენაა.

„ბრალდებული პირის საკნიდან დაკითხვაზე გაყვანა და უკან დაბრუნება ეს ჩვეულებრივი პროცედურაა. მთელი დავის არსი კი წარმოებდა იმაზე, გაიყვანეს თუ არა ის საკნიდან არასამუშაო საათებში“ – განაცხადა „მთავარში“ ზაქარია ქუცნაშვილმა.

შეგახსენებთ, რომ სახალხო დამცველმა ვანო მერაბიშვილის ციხიდან გაყვანის საქმესთან დაკავშირებით შსს-სგან გამოძიების დაწყება მოითხოვა.

მსგავსი თემები