ტვ “პირველის” გენდირექტორი ინგა გრიგოლია გახდა

ტელეწამყვანი და ჟურნალისტი, ინგა გრიგოლია დღეიდან ტვ “პირველს” უხელმძღვანელებს. ინფორმაციას ამის შესახებ არხის დამფუძნებელი და მფლობელი, ვატო წერეთელი ავრცელებს.

ტვ “პირველის” მფლობელის თქმით, ტელეკომპანია განვითარების ახალ ეტაპზე გადადის, რომელსაც დიდი გეგმებითა და მთელი გუნდის ერთიანი ძალისხმევით, ახალი დირექტორი ჩაუდგება სათავეში.

“ინგა “პირველზე” იმ დროს მოვიდა, როცა აქ პირველი აგური იდებოდა და ჩვენი ტელევიზიის ყველა თანამშრომელთან ერთად, მთელი ენერგია ჩადო ჩვენი ტელევიზიის განვითარებაში. უკვე დღეიდან “რეაქციასთან” ერთად, ის მთელი არხის ახალ ეტაპზე გადასვლის პროცესს ჩაუდგება სათავეში. მჯერა, ეს ახალი ეტაპი კიდევ უფრო წარმატებული გამოგვივა. ინგა გრიგოლია, წარმატებებს გისურვებ”, – წერს ვატო წერეთელი სოციალურ ქსელში.

თავის მხრივ, “ტვ პირველის” ახალმა დირექტორმა, არხის მფლობელ მადლობა გადაუხადა და სრული მზადყოფნა გამოაცხადა.

“მადლობა ვატო წერეთელს ამ ნდობისთვის და მადლობა ტვ “პირველის” მთელ გუნდს! ბევრი მადლობა! ესაა ჩემი ცხოვრების ახალი და ყველაზე საპასუხისმგებლო გამოწვევა, თან ყველაზე აზარტული გამოწვევა. აი ისეთი, ახალ სიცოცხლეს რომ გაძლევს, ახალ სუნთქვას რომ გიხსნის.

როცა სამსახურიდან გამოგდებულმა ტვ “პირველს” შევაფარე თავი და ყველამ ერთად ნულიდან დავიწყეთ ახალი ტელევიზიის კეთება, მაშინვე ვიცოდი, რომ გამოგვივიდოდა ყველა იმ ადამიანის დაუღალავი შრომით, ვინც ტვ “პირველი” დაიწყო ოპერატორებიან, მემონტაჟეებიან, მძღოლებიან, ტექპერსონალიან, ჟურნალისტებიან, პროდუსერებიან, მენეჯერებიანად. დღეს ამაყად ვამბობ, რომ გამოგვივიდა.

ახლა გადავდივართ განვითარების ახალ ეტაპზე და უკვე ახალი პოზიციიდან ვერთვები ამ რებრენდინგში. ვისაც ტელევიზია თავდავიწყებით გიყვართ და ვისაც გაქვთ განუსაზღვრელი თავისუფლების არხზე მუშაობის სურვილი, გამომეხმაურეთ. არხის დირექტორობას ვიწყებ ვაკანსიების ღიად გამოცხადებით. ვიწყებთ ახალ გამოწვევებთან ჭიდილს. ვეძებთ ტელევიზიაზე გაგიჟებით შეყვარებულ ადამიანებს, ვისთვისაც თავისუფლებაა ყველაზე გემრიელი და ყველაზე მთავარი ამ პროფესიაში. ვემზადებით უფრო დიდი მასშტაბებისთვის, შესაბამისად, გადავწყვიტეთ გავაფართოვოთ და კიდევ უფრო გავაძლიეროთ ჩვენი გუნდი. ჩვენი სათქმელი იგივეა და უცვლელი-ვმუშაობთ გავლენების მიღმა, მოვლენების შუაგულში. აგერ ვართ და ვისაც სურვილი და ამბიცია გექნებათ, გამოგვყევით ახალი სიმაღლეების დაპყრობაში. დღეიდან 24 საათში 25 საათი ვიწყებ მუშაობას”, – წერს ინგა გრიგოლია სოციალურ ქსელში.

მსგავსი თემები