ჯანდაცვის მსოფლიო ორგანიზაციის გადაწყვეტილებით, უსაფრთხოების მიზნებიდან გამომდინარე, COVID-19-ის სამკურნალოდ მალარიის საწინააღმდეგო პრეპარატის, პლაქვენილის ტესტირება შეწყდა, თუმცა საქართველოში კორონავირუსის სამკურნალო საშუალებებიდან მას, ჯერჯერობით, არ ამოიღებენ. ამის შესახებ განცხადება ინფექციური საავადმყოფოს ხელმძღვანელმა თენგიზ ცერცვაძემ გააკეთა.
მისი თქმით, პლაქვენილი ჯერჯერობით არც აშშ-ის საკვებისა და წამლის ადმინისტრაციას არ ამოუღია, რომელიც ამ სფეროში გადაწყვეტილების მთავარი მიმღებია.
“საქართველოში ჯერ ამოღება არ მოხდება, რამდენადაც ჯერჯერობით ის არ ამოუღია ამერიკისა და ევროპის არცერთ წამყვან კლინიკას და უნივერსიტეტს, რაც მთავარია, ის არ ამოუღია ამერიკის საკვებისა და წამლის სააგენტოს – FDA-ს. მთავარი, თავი და თავი ყველასთვის არის FDA-ს გადაწყვეტილება. სოლიდარობის კვლევა ერთი კვლევაა და ისიც ჯერ არ დაწყებულა. FDA აანალიზებს ყველაფერს და იღებს გადაწყვეტილებას. ჩვენ საქართველოს მაგალითზე არცერთი გვერდითი მოვლენა არ გვქონია. მე ვამბობ, ჩვენ ჯერ არ ამოვიღებთ, მაგრამ გავამკაცრებთ კონტროლს შესაძლო გვერდით მოვლენებზე, ისედაც ასე ვიქცეოდით, მაგრამ ყველა პაციენტს წინასწარ ჩავუტარებთ გულის სრულფასოვან გამოკვლევას,”- განაცხადა თენგიზ ცერცვაძემ.
