“ღონისძიებების შემსუბუქება ან რაიმე შეზღუდვის მოხსნა არ გულისხმობს იმას, რომ „კოვიდ-19“-თან ბრძოლა დასრულებულია, ან შეგვიძლია ვთქვათ, საქართველოში ეს საფრთხე არ დგას; დიახ, საფრთხე კვლავაც არსებობს”, – ამის შესახებ საერთაშორისო ურთიერთობათა საკითხებში საქართველოს პრემიერ-მინისტრის მრჩეველმა ირაკლი ჩიქოვანმა საქართველოს პირველი არხის საინფორმაციო პროგრამა „მოამბეში“ განაცხადა.
პრემიერის პრესსპიკერმა საქართველოს პირველ არხს და მის ჟურნალისტებს მადლობა გადაუხადა ყველაზე ცხელ წერტილებში – მკაცრი კარანტინით ჩაკეტილ რეგიონებში მუშაობისთვის და საზოგადოებისთვის მნიშვნელოვანი ინფორმაციის ოპერატიულად მიწოდებისთვის.
ირაკლი ჩიქოვანმა ისაუბრა ქვეყანაში კორონავირუსის გავრცელების წინააღმდეგ გადადგმულ ნაბიჯებზე და აღნიშნა, რომ საფრთხე ისევ არსებობს, თუმცა ხელისუფლების მხრიდან ადრეულ ეტაპზევე გადადგმულმა ნაბიჯებმა დადებითი შედეგი მოიტანა.
„რა თქმა უნდა, ეს შედარებითია. ჩვენ ვერ ვიტყვით, რომ ის მსხვერპლი რაც გვაქვს, პოზიტიურია, მაგრამ ის ციფრები, რაც არსებობს თუნდაც მეზობელ სახელმწიფოებში და ზოგადად მსოფლიოში, არის დადებითი შედეგი. მსუბუქი ავტომობილების გადაადგილებაზე აკრძალვის მოხსნის შემდეგ, გვქონდა მოლოდინი, რომ აკრძალვის პერიოდში მათ დაუგროვდებოდათ ისეთი საკითხები, რომელთა გადაჭრა ავტომანქანით გადაადგილებას მოითხოვდა. ასევე, იყო ბევრი დაცალკევებული ოჯახი იმის გამო, რომ სააღდგომო პერიოდში მოქალაქეებმა დატოვეს ესა თუ ის გეოგრაფიული პუნქტი, შესაბამისად, მივიღეთ გადაწყვეტილება, რომ დღეს და ხვალ ჩაკეტილ დიდ ქალაქებში შესაძლებელია დაბრუნება ფაქტობრივ მისამართზე. ჩვენი მთავარი მოთხოვნაა, არა მხოლოდ ხელისუფლების, არამედ ყველა ეპიდემიოლოგის, ყველა მედიკოსის, დავიცვათ სოციალური დისტანცია და მხოლოდ და მხოლოდ უკიდურესი აუცილებლობის შემთხვევაში დავტოვოთ ჩვენი საცხოვრებელი ადგილი“, – განაცხადა ირაკლი ჩიქოვანმა.
