პარლამენტის საპროცედურო საკითხთა კომიტეტის თავმჯდომარის თანამდებობაზე გიორგი კახიანი შესაძლოა, გურამ მაჭარაშვილმა შეცვალოს.
აღნიშნულ თანამდებობაზე გურამ მაჭარაშვილის კანდიდატურა იმ შემთხვევაში მოიაზრება, თუ გიორგი კახიანს პარლამენტის ვიცე-სპიკერის თანამდებობაზე დანიშნავენ, რომელიც ამჟამად კომიტეტის თავმჯდომარის პირველი მოადგილის პოსტს იკავებს.
საპარლამენტო თანამდებობების გადანაწილების მიზნით “ქართულ ოცნებაში” კონსულტაციები მიმდინარეობს. უმრავლესობას ორი ვიცე-სპიკერისა და რამდენიმე კომიტეტის თავმჯდომარეს დასახელებისთვის ერთკვირიანი ვადა აქვს. არსებული ინფორმაციით, ვიცე-სპიკერის თანამდებობაზე გიორგი კახიანის კანდიდატურაც განიხილება.
შეგახსენებთ, რომ საპარლამენტო თანამდებობები და უმრავლესობა 12-მა დეპუტატმა დატოვა, რომელთა შორისაც ყოფილი პირველი ვიცე-სპიკერი თამარ ჩუგოშვილი და ყოფილი ვიცე-სპიკერი ზვიად ძიძიგური არიან.
